“Sasán (droga) barak ne'ebé tama mai Timor-Leste, depois sai fali husi Timor liuhusi fronteira, tanba kestaun prevensaun iha aeroportu no fronteira ladún maka'as,” José Ximenes informa ba jurnalista, hafoin sorumutu ho Prezidente da Repúblika, iha Palasiu Prezidensial, Bairru-Pite, Dili, Segunda (22/07/2019).    

Kestaun prevensaun iha aeroportu no fronteira, tuir Prokuradór Jerál ne'e, sai kestaun ne'ebé importante. Tan ne'e, presiza halo avaliazaun ba sistema integradu iha aeroportu mós iha fronteira. 

“Ema mai, dala ruma ema ba tuur tiha iha fatin seluk mak kontrole ne'e mai la'o liu. Sasán to'o tiha ne'ebá mak ita hakfodak,” Ximenes afirma. 

Tan ne'e, PJR husu ba autoridade seguransa sira hanesan PNTL no alfandega iha aeroportu no fronteira atu halo sistema ‘reexame’ (revista dupla). Se lae, kilo bo-boot hanesan ne'e tama mai, ita hakfodak iha tiha ona Indonézia,” Ximenes esplika. 

Dadus ne'ebé Tempotimor.com iha, hatudu katak Timor-Leste sai beibeik ona fatin ida ba trafiku droga mundo nian.  

Iha Outubru 2012, Xanana Gusmão nu'udar Primeiru Ministru iha tempu ne'ebá, aviza ba mundu tomak kona-ba perigu husi invazaun droga mai Timor-Leste. Tanba, trafikantes sira hatene ona frazilidade husi autoridade seguransa no alfandega iha aeroportu no fronteira Timor-Leste ninian.

“Ita sai ona tranzitu. Tanba ita hatudu ba mundu katak ita fraku. Frakeza iha ita nia fronteira no ita nia servisus. 

Iha momentu ne'ebá, iha Aeoroportu internasionál Nicolau Lobato, Dili  Xanana Gusmão hatudu ba jornalista sira droga ho tipu kokaina kilograma lima (5), ne'ebé falun ho meius oioin. Inklui mós falun iha revista/livru laran.   

Tuir Xanana, trafiku kokaina ne'e mai husi Columbia-São Paulo (Brazil)-Dubai-Singapura-Timor-Leste-Indonézia.