Tempotimor (Dili) - Tuir Ministru Defeza, Seguransa no Ministru Interiór em ezersisiu katak, atu reativa fali Grupu Arte Marsiais só konsiénsia.
"Komisaun Reguladora Arte Marsiais (KRAM) briefing beibeik ami. Maibé, estudu ikus liu seidauk. Portantu, ami uluk ho Primeiru Ministru (PM) halo proposta ida hodi halo Taksforce ida para halo servisu ida integradu para haree duni moras ne'e iha ne'ebé. Maibé sua eselensia PM fiar ba iha KRAM no iha duni kompetensia para haree arte marsiais ne'e," dehan Ministru Defeza no Seguransa Filomeno de Jesus da Paixão iha Palásiu Governu, Kuarta (24/07/2019).
MDS mós hein oinsá rezultadu estudu ikus husi KRAM nian kona-ba GAM. "Ita hein de'it rezultadu ikus husi estudu KRAM nian ne'e oinsa. No atu reativa GAM ha'u sente lae karik. Bainhira oho malu hanesan ne'e beibeik, nunka mais atu reativa," Paixao afirma.
Nia dehan, se governu reativa fali GAM, ne'e governu mak iha vontade. Tanba, iha Konstitusaun RDTL fó direitu ema ho atu halo asuntu saida de'it. MDS afirma, iha lei nú. 5/2017 ne'ebé determina ka taka arte marsiais nia ezistensia.
"Iha lei bandu. Lei nú. 5/2017 bandu arte marsiais. Mas depois taka tiha, invez de ita mós para hadi'a an lae, ita mós oho malu. Ne'e atu ativa fali ne'e halo nusa? Loke la hetan. Ne'ebé nusa? Hakarak funu ho Polisia no F-FDTL ami prontu," MDS tenik.
