Sidadaun hamutuk na'in-16 ne'e, kompostu husi timoroan na'in-15, maioria mane, maibé feto ida nu'udar sidadaun Indonézia.
“Kona-ba illegal ne'ebé mak ami konsege detekta ne'ebé mak hetan kapturasaun husi autoridade fronteira hanesan Unidade Patrollamentu Fronteira (UPF), polísia fronteiras nian mak halo kapturasaun, e iha fulan-juñu konsege hetan kaptura 12 pesoál ne'ebé sira tau ba iha kuarentena, depois sira sai foti sansaun multa ba sira. Iha fulan-jullu mós, konsege hetan kaptura na'in-4, ne'ebé feto ida, mane 3. Iha ida sidadaun Indonézia, agora dadaun iha kuarentena”, informa Diretór jerál Servisu Imigrasaun, Luís Soares Barreto, iha Vilaverde, sesta (23/07).
Sira ne'ebé kaptura ona, servisu imigrasaun hamutuk ho Unidade Patrullamentu Fronteira (UPF) haruka ba Sentru Integradu Jestaun ba Krize (SIJK) hodi aplika kuarentena ba sidadaun ne'e durante loron 14 hafoin kontinua prosesa tuir mai.
“Ita simu depois agora dadaun sira hotu tama iha kuarentena, depois atu sai mak parte imigrasaun foin ba foti sansaun multas ba sira. Ida ne'e provizóriu imigrasaun situasaun kontrolu iha fronteiras nian”, dehan nia.
Maske nune'e, liuhusi prosesu investigasaun mak identifika sira komete atu krime ruma, parte imigrasaun sei enkamiña ba PNTL husi Servisu Investigasaun Kriminal (SIK) mak sei halo prosesu klean.
"Sé kuandu iha komete krime ruma, ami sei entrega ba parte investigasaun polísia nian para hodi halo prosesu kontinuasaun, karik kuandu iha komete kazu krime ruma”, afirma nia. (*)