Tempotimor (Dili) – Prezidente Repúblika Francisco Guterres Lú Olo husu ba Falintil Forsa Defeza Timor-Leste (F-FDTL) atu garantia seguransa ba konvidadus internasionál sira ne'ebé sei partisipa iha aniversariu tinan 20 Referendum no 20 Setembru.

"Ohin, ami la ko'alia barak. PR husu atividade saida mak forsa armada halo ba loron Konsulta Populár 30 Agostu no tinan 20 referendum nomós loron 20 Setembru. Ha'u dehan, ami nia atividade mak fó seguransa ba konvidadus internasionál sira no xefe estadu sira ne'ebé mai. Ami garantia seguransa servisu hamutuk ho PNTL," informa Maijor Jenerál F-FDTL, Lere Anan Timur bainhira remata enkontru ho PR iha Palásiu Prezidensiál Bairro-pite, Kuarta (07/08/2019). 

 

Eis komandante gerrilleiru ne'e hatete, nia rasik seidauk simu naran konvidadus internasionál sira ne'ebé atu mai."Se se mak atu mai ne'e, ha'u mós seidauk hatene. Ha'u rona de'it katak Indonézia  ninian mak atu mai, Brunei Darusalam, Filipina. Mas, ha'u seidauk hatene," Lere afirma. 

 

Kona-ba preparasaun, liuliu husi parte forsa armada nian, Lere informa katak forsa armada preparadu ona no prontu atu simu konvidadus internasional.

 

"Forsa armada preparadu. Agora, ami komesa treinu se mak la'o ho prezidente, se mak sai nia eskoltu, feto mak mai la'o ho primeira dama. Sira tenke. Tanba kestaun mais portókoler," dehan Lere.