Deklarasaun ne'e Komandante UPF ne’e hato’o, hodi hatán ba intervensaun Diretór Ezekutivu FONGTIL, Daniel Santos do Carmo, neebé dehan autoridade seguransa iha fronteira PNTL ho Falintil-Forsa Defeza Timor-Leste (F-FDTL) inkapasidade, tanba realidade ema kontinua hatama kilat (armas) ho Ilegál.
"Ami mós akompaña iha mídia sosiál, husi ONG FONGTIL hatete no lamenta kapasidade autoridade seguransa liliu PNTL, F-FDTL ne'ebé ladun iha kapasidade garante hodi arma ilegál kontinua tama iha Timor-Leste. Atu hatete katak, arma kilat-manu mak iha Suai, ita kaptura, prende tiha ona, agora prosesu ona. Tanba ne'e mak husu ba kolega sira ONG FONGTIL, labele baralla situasaun para bele implika, ba ita-nia komunidade sira ne'ebé mak hela iha fronteira", dehan Euides Belo, iha Komandu Jerál, Kaikoli, kuarta (08/09).
Tanba ne’e, husu ba Diretór FONGTIL atu ko’alia tuir saida mak haktuir iha nia kompeténsia ne'ebé hakerek nu'udár deskrisaun ba servisu rasik hodi kontribui informasaun pozitivu.
"Labele tau kanuru ba asuntu seguransa nian. Dala ida tan, ha'u husu para kna’ar saida mak ita halo ne'e, halo mak ita-nian. Labele tau kanuru ba seguransa nian. Sé ita timoroan tenke kontribui, fó informasaun pozitivu, labele fó informasaun ida ke atu baralla fali situasaun, labele", hatete Euclides.
Ho kilat ne'ebé UPF sira prende iha fronteira terrestre, la'ós tiru ema mate, tanba Kilat-manu (kilat-anin).
Bainhira públiku hakarak atubele hetan verdade katak kilat-manu ne'e bele oho ema ka la oho ema, maka nia rasik prontu bele uza sniper hodi tiru koko nia liman.
"Bele tiru ha'u-nia liman. Ha'u mate ka la’e?. Tanba ne'e mak ha'u fó hatete ba sira, ha'u esperiénsia kaer kilat ne'e ho 20 ital anus, ha'u kaer kilat. Tanba ne'e mak husu ba Diretór FONGTIL diretór de'it. Mais staff sira selseluk la’e. Diretór de'it, tenke hadi'a ninia intervensaun iha mídia sosiál”, haktenik nia.
Nune'e, nia mós husu ba Televizaun Grupu Média Nasional (GMN) atu tranzmite informasaun ruma ba públiku karik, tenke edita halo didi'ak, nune'e bele fó sai informasaun ne'ebé edukativu ba públiku.
"Husu mós ba mídia GMN, editór tenke haree didi'ak depois mak pasa informasaun. Tanba ami iha liña fronteira ne'e mak garante seguransa ba komunidade lubuk ida, husi Oekussi, liliu husi Sakato to'o Citrana, nune'e mós husi Mota-ain, to'o Mota-masin, para komunidade sira labele sente traumátiku ba informasaun ne'ebé mak Diretór ko’alia”, afirma nia. (*)