"En prinsípiu UPF ne'ebé mak koloka dezde kedas tinan 2002, até agora, sira hala'o misaun tolu ke importante. Iha ha'u-nia mandatu ne'ebé ha'u kumpri ona durante fulan rua-resin, ha'u identifika katak, membru UPF la'ós de'it garante seguransa iha liña fronteira, maibé iha aspetu 3 sira hala'o. Ida, hanesan polísia UPF ne'ebé garante seguransa ba liña fronteira tomak. Iha aspetu ida, sira hanesan ajente defeza ba ita-nia soberania Timor-Leste nian. Terseiru, sira mós halo diplomásia", esplika Komandante UPF, Superintendente Euclides da Costa Belo, iha Komandu Jerál, Kaikoli, kuarta (08/09).
Kna'ar diplomásia ida ne'e, la'ós hanesan ho servisu sira ne'ebé Ministériu Negósiu Estranjeiru no Kooperasaun (MNEK) nia funsionáriu sira hala'o, maibé halo diplomásia ida liuhusi koordenasaun ida kulturalmente ho seguransa no defeza nasaun viziñu nian ligadu ba animál ultrapassa ilegál tama no sai nasaun rua nian.
Tanba sidadaun sira husi parte Indonézia nian halo mós natar, to'os iha Timor-Leste nia rain, no husi Timor-Leste nian mós hanesan, tanba komunidade sira ne'ebé mak hela iha liña fronteira parte Indonézia nian ho Timor-Leste ne'e, sira iha relasaun família de'it.
"Tanba ida ne'e mak ita PNTL-UPF ne'e, halo misaun tolu ne'e, ida seguransa, defeza, doplomásia. Buat tolu ne'e atu la'o ho di'ak, mak UPF sira utiliza karáter Polosiamentu Komuniária nian. Ida ne'e mak sira halo com que, to'o ohin loron situasaun hothotu la'o di'ak, tanba ita iha koolaborasaun, kooperasaun no komunikasaun di'ak ho autoridade lokál sira ne'ebé mak hela iha liña fronteira, liliu munisípiu tolu", dehan nia.
Entretantu, situasaun seguransa iha fronteira, oras la'o ho di'ak no hakmatek, tanba hetan apoiu servisu hosi Komandu PNTL Munisípiu Covalima, Bobonaru, no Rejiaun Administrativa Espesial Oekussi Ambeno (RAEOA).
"Ami koordena malu. Embora ida ne'e mós ami iha Suai, iha mós apoiu husi Unidade Polisia Marítima (UPM), ne'ebé kontrola mós iha tasi ibun, no iha mós apoiu hosi forsa F-FDTL ne'ebé apoiu mos seguransa iha liña fronteira. Iha Tunubibi, Altu-lebos, no iha Mota-ain, polísia militár mak koloka iha ne'ebá, ami servisu loron kalan, ami hamutuk nafatin", dehan nia. (*)