Print this page

Komisaun Rekrutamentu Anúnsia Kandidatu Membru Foun F-FDTL Na'in-600

By September 15, 2021 21470
Xefe Estadu Maior Forsa Armada, Brigadeiro Jenerál, Calisto Santos "Coliati" (karuk), anunsia lista naran kandidatura foun membru F-FDTL, iha Sala Auditóriu kuartel Fatuhada, kuarta (15/09). Xefe Estadu Maior Forsa Armada, Brigadeiro Jenerál, Calisto Santos "Coliati" (karuk), anunsia lista naran kandidatura foun membru F-FDTL, iha Sala Auditóriu kuartel Fatuhada, kuarta (15/09). Foto Tempo Timor

Tempotimor (Dili)-Komandu Falintil-Forsa Defeza Timor-Leste (F-FDTL) liuhusi komisaun rekrutamentu anúnsia ona lista naran ba kandidatu membru foun F-FDTL hamutuk na'in-atus-neen (600) ne'ebé aprovadu ona hodi prepara-an atu inkorpora ba membru foun F-FDTL nian.

"Ohin, komisaun de rekrutamentu das Falinitil-FDTL ba tinan 2021, deklara ba públiku katak, ohin 15 de Setembru 2021, komisaun de rekrutamentu ofisialemente públika naran kadetes ou rekrutas ne'ebé konsidera aptus ka liu iha teste hodi bele mai inkorpora iha instituisaun das Falintil-FDTL. Totál mak 600, agora feto mak iha 11% husi 600 pesoál", informa Xefe Estadu Maior Forsa Armada, Brigadeiro Jenerál, Calisto Santos "Coliati", iha Sala Auditóriu kuartel Fatuhada, kuarta (15/09).

Tanba ne'e, komisaun rekrutamentu husu ba joven feto no mane iha territóriu nasionál ne’ebé iha tinan rua ba kotuk, ba tuir ona teste ezame médika Psiko tékniku no eskrita, orál no fízika iha sentru instrusaun Komandante Nicolao Lobato, iha Metinaru, atubele hakbesik-an ba ida-idak nia munisípiu hodi haree naran.

"Komisaun de rekrutamentus sei hodi listas ou naran ba taka iha fatin sira hanesan, administrasaun munisípiu, komandu da polísia nasionál ou komandu ba polísia munisipál, no sede ba konsellu de kombatente da libertasaun nasionál konsellu dos veteranu. Ba kadetes ou rekruta ne'ebé naran sai ou pasa, tenke mai aprezenta-an imediata tuir munisípiu hodi rona orientasaun", dehan nia.

Tuir oráriu, iha kuarta (22/09), maizumenus tuku 09:00, kadate sira husi Munisípiu Dili, Likisá, Bobonaru, Ermera, Aileu, Manatutu no Baukau, sei aprezenta-an ba iha Kuartel Jenerál F-FDTL, Fatuhada.

Enkuantu, kadete sira husi Munisípiu Lautein, Vikeké, Manufahi, Ainaru, Covalima, Oekussi, no kadete sira husi rejíme espesiál, tenke aprezenta-an iha loron kinta (23/09), ho oras ne'ebé hanesan, iha Kuartel Jenerál Falintil-FDTL, Fatuhada.

Kadetes ne'ebé atu aprezenta aan, tenke simu vasina kompletu, bainhira la aprezenta-an tuir data ne'ebé hasai ona, komandu F-FDTL liuhusi komisaun rekrutamentu sei halo kedas eliminasaun (halakon).

Hafoin iha loron 27 Setembru 2021 ne'e, iha tuku 09:00 oras dadersan, kadete sira aranka ona husi Kuartel Jenerál Fatuhada ba Sentru Formasaun no Terenu Metinaru hodi inkorpora ona ba treinamentu militár, durate fulan tolu.

Husi númeru kadete sira ne’ebé pasa maioria veteranu nia oan sira. “Maioria ne'e veteranu, purtantu iha ne'ebá tanba iha intensaun rekrutamentu 2021, señor Xefe Estadu Maior Jenerál das Fosas de Defeza, deklara ba públiku katak, rekrutamentu 2021, prioridade ba veteranu. Tanba ne'e mak maioria ne'e ba veteranu”.

Iha fulan rua ba kotuk, kandidatu hamutuk ema na'in-2400 ne’ebé mak tuir teste, psiko tékniku, orál no eskrita, no rezultadu ikus, hamutuk kadetes na'in-600 mak aprovadu, nune'e, kandidatu na'in-1800 mak reprovadu ka la pasa. (*)

Rate this item
(39 votes)
Last modified on Wednesday, 15 September 2021 18:54
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items