"Ita fó ona ba komandante eskuadra sira hodi nune'e sira-nia patrulla bele habelar ka hatutan informasaun ne'e ba ita-nia komunidade sira liliu ba sira ne'ebé mak hela iha área risku ninian, iha mota ibun ka, balu ba hela fali iha mota laran ne'e, fó hatene ba sira informasaun ida ne'e, e husu ba sira atu nune'e hasees-an husi fatin ne'ebá, molok ita enfrenta situasaun ida ne'e", dehan Komandante Henrique, ba jornalista sira iha Komandu Kaikoli, kuarta (22/09).
Tuir informasaun ne'ebé relata husi Sekretária Estadu Protesaun Sivíl (SEPS) liuhusi Diretór Jerál, Ismael da Costa Babo, kona-ba previzaun tempu katak, iha tempu besik sei akontese udan ho anin-boot iha territóriu tomak.
Nunee, husu ba komunidade sira iha kapitál nasaun, atu hasees-an dadauk ona husi fatin sira ne'ebé iha poténsia ba risku dezastre, hodi evita impaktu ba sira-nia vida.
"Orientasaun ita fó ona ba komandante eskuadra sira atu nune'e kontinua ba ita-nia komunidade sira", hatete nia.
Haree ba munisípiu Dili, postu Administrativu sira hanesan Ataúro, Cristo-Rei, Dom Aleixo, Metinaru, Nain-Feto, Vera-Cruz, ho Suku hamutuk 36. (*)