Lere Husu Kadetes F-FDTL Envolve GAM Entrega Atributu"Loron ida imi sei entrega imi-nia atributus, imi-nia farda, imi-nia buat hothotu ba instituisaun. So ida ne’e mak imi tama ba efetivu loloos, antes imi sei halo juramentu ba bandeira", dehan Lere Anan Timur, iha kuartel Jenerál Fatuhada, Dili, segunda (27/09).
Kadates foun sira ne'ebé tama, balu mós nu'udár membru husi grupu arte marsiál sira hanesan, Persaudaraan Setia Hati Terate (PSHT), Kmanek Oan Rai Klaran (KORK), Kera Sakti, no inklui seluk tan.
Tanba ne'e, hahú husi Loron segunda (27/09) ba oin, laiha tan ema ruma atu temi naran grupu arte marsiál ninian, maibé hothotu sai ona hanesan membru ba instituisaun Falintil-Forsa Defeza Timor-Leste (F-FDTL) ho loloos.
"Apartir ohin ba oin, imi membru Falintil-Forsa Defeza Timor-Leste ninian. Laiha SH, laiha Arte marsiál iha forsa nia laran. Imi uluk, mai tuir teste, imi deklara imi-nia an, tanba kritériu ida mak, dehan katak tenke sinseru, laran moos, leal. Sé ó arte marsiál KORK ninian, dehan ha’u KORK ninian, ha’u SH ninian, ha’u SH ninian. Imi deklara imi-nia an hotu, e hakerek ona iha surat, rai hela iha repartisaun pesoál ne'ebá. Tanba ida ne'e mak ha'u husu ba imi, apartir ohin ba oin, laiha arte marsiál", apela Lere.
Iha ne’en, husu mós ba kadetes foun sira atu labele dependénsia ona ba inan-aman sira, uma-kain, maibé depende ona ba família boot komandu Falintil-FDTL ninian.
Bainhira komandu haruka dehan la'o kalan ka loron, tenke halo tuir, mais nu'udár ema, komandu sei fó autorizasaun ba kadetes foun sira hodi ba vizita sira-nia família.
"Ohin ba oin, laiha arte marsiál iha Falintil-Fosa Defeza nia laran. Imi sei hadomi malu hanesan maun ho alin. Lakohi, aban bainrua, ida ne'e baku malu ho Kera Sakti ka SH. Ida ne'e labele akontese. Ida ne'e maka ami-nia hakarak. Dala-ida tan susesu boot, dixiplinadu e responsável ba imi-nia kareira ida ne'e", afirma nia. (*)
