Tanba asidente ne'e mosu iha loron domingu (03/10), maizumenus tuku 12:00 kalan, envolve husi membru Falintil-FDTL ho inisiál LCS, ne'ebé konduz karreta servisu nian hodi soke lixu fatin iha área Bekora.
“Iha ona informasaun hosi sira-nia komandu, e agora polisia militár sei halo prosesu atu hatene kauza tan saida mak karreta ne'e soke”, deklara Xefe Estadu Maior Falintil-FDTL, Brigadeiru Jenerál Calisto Santos ‘Coliati’, iha kuartel Polísia Militár (PM), Kintál-boot, segunda (04/10).
Iha prosesu ne’e sei la’o nafatin, bainhira identifika membru ne’ebé konduz sala sei asume responsabilidade tuir regulamentu militár nian.
“Bainhira nia sala, militár iha regras, purtantu iha oma regulamentu dixiplina militár, iha ne'ebá maka sei hatene katak nia sala ne'e saida. Iha ne'ebá ne'e iha lei. Lei ne'e iha artigu ida ne'ebé mak nia viola, depois nia sei responde tuir artigu ida ne'e”, dehan nia.
Tuir loloos membru ne'e simu orientasaun husi nia komandu Batallaun I Baukau, atu foti karreta iha ofisina (begkel), lori fila ba servisu fatin, maibé infelizmente hetan asidente iha dalan.
"Ida lori karreta ne'e, nia kondutór, purtantu nia simu ordém husi komandu atu mai foti karreta iha bengkel, para depois atu lori fila. Agora, atu lori fila oinsá mak hetan dezastre, depois ida ne'e nia sei responde”, afirma nia.
Komandante Tránzitu Polísia Nasionál Timor-Leste Munisípiu Dili, Inspetór Domingos Sarmento Gama informa, hafoin akontesimentu, membru sira Seguransa Rodaviáriu sira to'o kedas inisidente, maibé seidauk rekolla informasaun ruma husi vítima, tanba hetan kanek gráve no oras ne'e halo hela tratamentu saúde iha Hospital Nasionál Guido Valadáres (HNGV), Bidau.
"Ida kondutór mós halo hela tratamentu, maibé ita seidauk foti deklarasaun kona-bá motivu asidente, ne'ebé iha hela prosesu. Depois hetan tratamentu hotu, ita bolu hodi fó deklarasaun kona-bá asidente hirak ne'e”, dehan nia.
Enkuantu, karreta ne'e ho númeru matrikula F-FDTL 230, kondisaun estragu totál no oras ne'e transporta ba ona ba Kuratel Jenerál, Fatuhada. (*)
