“Laiha toleransia ba organizasaun ka movimentu ruma mak halo asaun iha loron ne'ebé determina tiha ona,” afirma Komandante Operasionál PNTL, Superintendente Xefe Pedro Belo iha konferensia imprensa, Kuarta (28/08/19) iha Kuartél Jenerál PNTL, Kaikoli, Díli.
Nia dehan, haree ba importansia husi loron Konsulta Populár ba dala 20, ne'ebé hala'o iha Tasi Tolu, PNTL bandu ba grupu ka organizasaun nomos movimentu sira atu halo manifestasaun ka Marsa da Paz iha Kapitál Díli mós munisípiu seluk.
Tuir Pedro PNTL mós bandu atu movimentu ka organizasaun ruma hato'o karta petisaun ba bainaka internasionál sira, inklui embaixada sira iha Díli," alerta eis komandante PNTL Munisípiu Díli ne'e.
"Ba grupu, organizasaun no movimentu ruma ne'ebé mak la kumpri orientasaun PNTL nian ne'e, sei aplika lei no lei sei la'o," Pedro dehan tan.
PNTL sei atua asaun ruma ne'ebé kontra orientasaun PNTL nian iha Kapital Díli, inklui munisípiu. "Durante periodu loron Konsulta Populár no xegada INTERFET nian iha rai doben Timor Leste, PNTL sei kumpri ordem hodi halo atuasaun bazeia ba lei numeru 1/2016 kona-ba liberdade reuniaun no manifestasaun artigu 10 ho avizu previu husi pontu ida to'o haat," Pedro subliña.
Pedro mós husu ba ema hotu iha rai doben Timor-Leste atu kontribui ba seguransa iha loron Konsulta Populár ba dala 20 no xegada INTERFET nian iha Timor-Leste.