"Kursu ne'e hanesan ita-boot sira hatene, la'ós de'it iha Institutuisaun militár maibé Institutuisaun hothotu iha, nune'e ohin sira hamutuk 16 ne'ebé termina ona sira nia kursu, iha área jestaun administrasaun nia ne'ebé la'o durante fulan 4, no ita ohin oferese ona sira-nia Sertifikadu”, dehan Xefe Estadu Maior F-FDTL, Brigadeiro Jenerál Calisto Santos "Coliati", iha kuartel Jenerál, Fatuhada, sesta (26/11).
Ho kursu ne'e rasik, atu aumenta koñesimentu militar nia, no kapasita sira liliu, iha sira-nia servisu, oinsá mak atu profesionaliza didi’ak sira-nia servisu iha futuru.
Diretór Projetu 2, Kooperasaun Militár Portugeza, Tenente Koronel João Pimenta mós apresia ho formandu na’in-16 ne'ebé termina ona sira-nia kursu iha área jestaun administrasaun nia.
"Ba militar sira ne'ebé ohin termina ona sira-nia kursu ne'e, ha'u hakarak atu felisita no rekoñese hodi apresia ita-boot sira-nia esforsu no dedikasaun durante iha kursu ne'e, espera ita-boot sira sei progresu ita boot sira-nia matenek iha kada funsaun no servisu ne'ebé ita-boot sira hala'o ba”, hatete nia.
Entretantu formandu hamutuk 16 ne'e kompostu husi, Kuartel Jenerál na’in-5, Komponente Naval 4, komponente terrestre 2, CFT 1, Unidade FALINTIL 2 no Unidade Polísia Militár 2. (*)