"Aami husu ba Ministru defeza, se aban bairua iha tinan oin, rekrutamentu F-FDTL tan karik tau matan mós mai ami-nia suku ne'e, tanba luta ba rai ida ne'e ami mós luta hotu, mai to’o 1999 mós ami tebe rai hotu iha rai ne'e, pelumenus joven ida rua kaer netik kuda tali ne'ebé uluk ita halo ne'e”, dehan Liberato Nunes, iha sede suku Lisadila, kuarta (08/12).
Tanba rekrutamentu F-FDTL ba tinan 2021 ne'e liu ona, maibé autoridade lokál nafatin preokupa tanba joven husi suku Guiso ho Lisadila nia ema laiha ida mak liu iha rekrutamentu refere.
"Maske liu ona mós ha'u preokupa tebes, tanba iha nia kritéria ne'e dehan, fó oportunidade espesial ba veteranu nia oan sira, ne'e duni ami hatama Veteranu oan sira ba, maibé na realidade husi postu Maubara, suku hitu ne'e suku lima nia ema sai, so úniku ami nia suku inklui ho suku Lisadila mak lae”, informa nia.
Ho ida ne’e, kria komunikasaun ne'ebé la di’ak entre líder komunitáriu ho joventude husi suku refere, tanba joventude nafatin protestu katak líder komunitária sira mak laiha resposabilidade ba dokumentu hodi la hatama.
"Joven sira mai protes katak ami mak la hatama sira-nia dokumentu karik, maibé la’e ami la'o tuir kritéria hotu ne'ebé iha, ne'ebé ida ne'e hanesan kria komunikasaun ladun di'ak entre ami ho joven sira”, dehan nia.Xefe Suku Lisadila, Fernando Lobo, mós preokupa tebes ho asuntu ne'e, tanba ko’alia sobre luta ba rai ida ne'e suku Lisadila ho Guiso nia ema mós luta hotu ba ukaun rasik-an.
"Nune'e husu ba parte relevante sira, toma atensaun mós ba ami-nia joven sira iha suku ne'e, nune'e ami-nia oan sira mós sente katak, los duni uluk ami-nia inan aman sira mós luta ba rai ida ne'e”, afirma nia. (*)