Autoridade Lokál Suku Uaimori Francelino António Gomes, haktuir suku Uamori ne'e, hanesan suku istóriku ida-ne'ebe uluk FALINTIL konserta no subar-aan ba, maibe ukun tiha, suku Uamori sai fali fatin izoladu.
“Suku Uaimori hanesan suku istóriku no fatin konsentrasaun FAILINTIL nian, maibé até a data, ami-nia dezenvolvimentu tarde tebes, hanesan eletrisidade, bee-moos no estrada,” dehan nia ba www.tempotimor.com iha Suku Uaimori, domingu (28/2).
Tuir nia, prekupasaun primeiru maka konstrusaun estrada, tanba suku Uaimori tama perténsia munisípiu Vikeke nian, maibé komunidade sira-nia movimentasaun asesu liuhusi fali estrada ba postu Venilale, munisípiu Baukau nian.
Preokupasaun daruak, maka ba bee-moos, mesmu grasa boot maromak nian, Cruz Vermelha Timor-Leste (CVTL) konstrui no kanaliza ona bee-moos, maibé tempu udan boot, bee ne'e rasik nakfilak ba bee merak, nune'e halo komunidade sira tenke hakat fali ba kuru bee-mota hodi konsumu.
Preokupasun datoluk, maka kona-ba eletrisidade, durante ne'e, populasaun seidauk asesu ba eletrisidade.
Autoridade Lokál ne’e fó-sai katak, oras ne’e atu dada eletrisidade presiza kilómetru 25 hafoin tama iha suku Uamori.
Ho preokupasaun hirak ne'e hotu, parte suku tenta halo ona proposta ba governu, maibé to'o oras ne'e governu seidauk tau atensaun.
“Dezde 1999 sa'e mai ne'e, preokupasaun ba ami ne'e lubuk ida, ami hato'o, no tenta halo proposta oinoin, hato'o duni maibe laiha rezultadu, tanba ne'e durante popupasaun konsumu de'it bee mota, iha ne'e CVTL halo ona konstrusaun ligasaun bee ne'e, maibé kuandu tempu udan bee ne'e merak, ne'ebé komunidade sira sempre kuru fali iha mota,” hatete nia.
Mesmu nune'e, nia parte apresia ba esforsu tomak, Amu Locateli ne'ebe esforsu tomak hodi kosenge atrai inisiativa Antigu Alunu sira no komunidade sira -ia hanoin hodi kria uma kapelaun foun Santu Calisto Caravário.
Entretantu Tuir observasaun www.tempotimor.com iha terrenu nota katak, estrada ne'ebé liga husi suku Uaimori ba Postu Administrativu Venilale, iha mota boot hamutuk 3 maibÉ laiha ponte.(*)