Desizaun ne’ebé governu foti hodi aplika serka sanitária no konfinamentu domisiliáriu obrigatóriu hahú husi loron 15 fulan-marsu to’o 2 fulan-abril ba Kapitál Nasaun. Allende ne’e Munisípiu Vikeke no Baukau hahú aplika iha loron 15 to’o 29 fulan-marsu tinan 2021.

Vinsensius Lufraga Kebelen nu’udar membru husi Grupu Juventude Agrikultór Makadike (GJAM) informa, dadauk sira prepara hela fós tonelada 30, no batar tonelada 50 atu hatama ba kompaña fornesidór sesta bázika balun iha Dili.

Maibé, produtu lokál hirak ne'e, Grupu Juvetude Agrikutót Makadike la konsege atu lori mai tanba Dili kumpre hela regra serka sanitária.

Tanba ne'e, husu ba Primeiru Ministru (PM), Taur Matan Ruak atu hola medida ruma oinsá mak bele fò autorizasaun ba ekipa hirak ne’ebé durante ne'e rekolla produtu lokál atu oferese ba kompaña sira atubele fahe ba populasaun iha Timor-Leste.

"Ami-nia grupu dadauk prepara tiha ona atu lori ba, ha’u mós hasoru malu ho Administradór Munisípiu Vikeke mais katuas ne'e dehan hanesan, sasán lori ba to'o de'it iha metinaru, entaun ami telefone fali kompaña iha Díli ne'e sira atu mai tula fali iha metinaru mós sira dehan labele tenke lori tama to'o Díli, ne’ebé ami atu lori ba arska uituan”, dehan nia ba www.tempotimor.com liuhusi telefone, segunda (22/03).

Tuir planu, sasán hirak ne'e sei oferese ba Movimentu Kamponezes Timor-Leste (MOKATIL) hafoin hatama fali ba kompaña fornesidór sesta bázika iha munisipiu Dili.