Tuir diretór Domingos, iha 2018 parte eskola halo ona proposta ba edukasaun munisípiu Bobonaro no nasionál, maibé proposta ne'e to'o agora laiha rezultadu.
“EBC Tunubibi nia kondisaun mak ne'e, aat no besik atu monu ona, maibé obrigadu ami tenke uza nafatin mezmu aula tolu de'it mak funsiona inklui sala enkontru ida, ne'ebé ami uza hotu ba aprendizajen. Mais agora ami la eskola tanba estadu emerjénsia hela," dehan Diretór EBC Tunubibi ba www.tempotimor.com iha Tunubibi, Tersa (2/3).
Nia hatutan, prosesu aprendizajen eskola nee paradu hela tanba EE, mezmu prosesu aprendisajem la'o ona to'o pursentu 25%, maibé tarde ona tanba iha fulan Abril tama ona ezame periodu dahuluk nian.
Iha parte seluk, xefe aldeia Tunubibi, Fernando Raul katak, iha tinan 2014 no 2015 iha programa ida atu halo reabilitasaun ba eskola hotu munisípiu Bobonaro, maibé ikus mai EBC Tunubibi la hola parte ba reabilitasaun.
Autoriedade lokál ne'e mós akresenta, tempu ne'ebá diretór edukasaun munisípiu Bobonaro ho ekipa halo ona verifikasaun, maibé to'o agora la realiza no eskola ne'e rasik la hetan reabilitasaun.
"Uluk diretór edukasaun munisípiu Bobonaro nian, mai verifika tiha ona, maibé realidade mak eskola ida ne'e la tama iha planu reabilitasaun nian," katak Fernando.
Fernando mós reafirma katak, nu'udar autoridade iha Tunubibi, kontinua luta hamutuk ho diretór no mestre sira iha EBC Tunubibi, para bele atinje ojetivu liu-liu harii kondisaun eskola di'ak ba oan sira.
"Hanesan xefe aldeia iha ne'e labele nonok de'it, maibé hamutuk ho diretór no profesór sira tenke hakbesik aan ba autoriedade kompetente sira. Maibe agora ho situasaun hanesan ne'e ita labele halo buat ida, maibé atu dehan katak problema ho kondisaun eskola ne'ebé perigu no ameasa ba estudante no mestre sira," dehan autoridade ne'e.
Entretantu EBC Tunubibi totál estudante 581, aula aprendisajem haat inklui kondisaun eskola ne'ebé fó perigu tebes ba estudante no mestre sira. Depois EBC Tunubibi rasik iha nia filiál lima ne'ebé ho totál estudante liu rihun ida.(*)