Atividade operasaun ne'e PNTL hala'o, hodi evita propagasaun surtu COVID-19, atu labele lori transmisaun mai populasaun sira iha kapitál munisípiu Dili.
Portavós Komandu Jerál PNTL, Superintendente Xefe Arnaldo de Araújo, esplika operasaun ne’e hodi husu konsiénsia abitante sira nian atubele kumpre regra hodi prevena-aan husi ameasa surtu COVID-19.
“Hahú ohin PNTL Bobonaro no Covalima ezekuta ona operasaun hodi kontrola ita-nia sidadaun sira-ne'ebé halo movimentu ba mai para ita prevene-aan husi moras ne’e,” Portavóz Arnaldo informa ba jornalista sira iha Komandu Jerál PNTL Kaikoli, tersa (16/02).
Nia dehan, ba abitante sira ne’ebé uza transporte, maibé lakohi kumpri regra hodi kontinua viájen mai Dili, PNTL sei foti asaun tuir lei.
Arnaldo informa, ohin PNTL munisípiu Bobonaro no Covalima hahú halo ona sosializasaun ba motorista Angguna, Bís no Mikrolete sira hodi kumpre regra sira-ne’e.
“Hahú ohin ita-nia polísia tránzitu sira taka ona estrada hodi bandu Ita-nia populasaun Bobonaro no Covalima labele mai ona Dili to'o tempu ne’ebé determina,” nia hatete.
Entretantu, molok ne’e Governu liuhusi reniaun Konsellu Ministru (KM) iha loron 15 fevereiru 2021, aprova projetu rezolusaun governu ne’ebé impoin kona-ba sanitária ida iha Munisípiu Bobonaru no Covalima, tanba kazu diágnóstikadu sira seluk ho SARS-Cov-2, dezignadamente kazu detetadu sira-ne’ebé proveniente husi tama ilegál iha país, atu akautela saúde públika populasaun no impede okorrénsia transmisaun komunitária husi SARS- Cov-2 iha territóriu nasionál.
Projetu-rezolusaun Governu nian ida-ne’e hanesan invertida dezlokasaun sira entre munisípiu sira-ne’e no munisípiu sira seluk.
Alende ne'e, iha rezolusaun Governu ida-ne’e prodús efeitu sira iha loron tuir mai ba ninia publikasaun no termina iha tuku 23:59 husi loron loron 3 fulan-marsu tinan 2021.(*)