Komemorasaun trajedia Balibó iha loron 16 fulan-Outubru, ho atividade konjuntu husi Kl no CNC realiza dialogu komunitáriu atu promove Balibo nu’udar “sidade liberdade” iha Timor-Leste no promove loron 16 Outubru nu’udar loron nasionál liberdade imprensa no liberdade espresaun.
Tanba ne’e, nu’udar rekoñesimentu ida ba jornalista Australianu na‘in-lima no jornalista sira seluk ninia kontribuisaun ba Timor-Leste nia ukun-an.
Nune’e, iha loron 14 Outubru 2021 KI ho CNC realiza ona dialogu komunitária ho autoridade lokál Munisípiu Bobonaro espesialmente ho autoridade lokál Postu Administrattivu Balibo.
"Dialogu ne’e partisipa husi reprezentante sira entidade hanesan veteranu, organizasaun estudantil rezistensia, xefe suku no sira seluk tán", dehan Prezidente KI, Virgilio Guterres hafoin komemora Balibó-Five ba dala-46 iha Balibó, sábadu (16/10).
Iha dialogu refere diskute sikuensia istoriku sira ne'ebé atu transforma Balibó ba sidade liberdade. Sikuénsia historiku hirak ne’ebé refleta Balibó nia historia pasadu ba luta libertasaun nasionál Hahu husi forte Balibó, trajedia Balibo 5, Deklarasaun Balibó, invazaun 7 Dezembru no exodus Setembru 1999.
Dialogu mós diskute elementu sira impórtante balu atu lori Balibó ba futuru hanesan sidade liberdade iha Timor-Leste.
"Elementu impórtante sira ne’ebé sei garante Balibó ba sidade futuru liberdade mak, promove Balibo atu sai ditinasaun turizmu istonku, promove interkambiu sosiu kulturál no polítika, promove interkambiu ekonémia no promove estabilidade seguransa iha fronteira", informa nia.
Nune’e, ba sikuensia istoriku Balibó nian ba luta libertasaun nasionál, refleta ba dezenvolvimentu ne‘ebé integradu ba Balibó iha futuru no refleta mós ba reportajem Greg.
Transforma Balibó husi knua naran laek ba Balibó sidade liberdade mak KI ho CNC rekomenda atu dekreta loron 16 Outubru nu’udar loron nasionál liberdade imprensa.
Tanba ne'e, atu alkansa objetivu ne’e, KI ho CNC hamutuk ho autoridade Munisípiu no autoridade lokál no lider komunitária Balibó nian sei hala’o asaun sira mak, kontinua halo asaun konkreta ba oin hodi halo peskiza narativa kona-ba sekuensia konseitu Balibó sidade liberdade.
Iha ne’e, sei halo mós advokasia no intensiva kampaña Midía, Dialogu ho líder nasionál sira, partidu politiku, autoridade munisipal no autoridade lokal sira iha Balibo.
Konseitu Balibo Sidade Liberdade ne'e parte KI ho CNC halo rekomendasaun ba Governu atu determina liuhusi dekretu ka rezolusaun Governu nian hodi kontinua promove kultura diskusaun entre autoridade Munisípiu Bobonaro kona-ba konseitu dezenvolvimentu Bobonaro ne’ebé estratéjiku no sustentavel. (*)