"Ami sira hahú husi Maun Xanana, maun Lú Olo no komandante sira hotu, ami lafiar katak loron ida ne'e (referendu) mosu lais loos tanba sempre fiar Timor ukun-an maibé ami nu'unka fiar katak ami bele moris, tanba ami-nia maluk barak mate dalaruma ami hanoin tanba saida mak ami tenke moris no sira mak tenke mate?. Maibé sira mate ita moris, sira mate ba nasaun ida ne'e entaun", deklara eis Gerilleiru atual Primeiru Ministru, Taur Matan Ruak, iha Uaibitai, Laumana, Suku Letemumu, Kelikai, domingu (23/08).
Iha prosesu luta ba libertasuan patria durante tinan 24 timoroan barak mak lakon no fakar rán ho objetivu ne'ebé klaru iha loron ida sei hetan ukun rasik-an.
Tanba selebra loron referedu 30 Agostu ba dala-22 (30/08/1999-30/08/2021), hanesan loron espesiál ba povu Timor-Leste determina nia luta hodi bele restaura nia independénsia.
"Loron ida 30 de Agostu ne'e espesiál loos termina hodi loke loke dalan, fó dalan ba ita restaura ita-nia independénsia, entaun hakarak antesipadamente, lori ha'u-nia naran, ha'u-nia Governu tomak nia naran saúda povu Timor Lorosa'e ba loron 30 de Agostu ne'ebé besik ona ", afirma Taur Matan Ruak.
Iha loron referedu maske Timoroan barak mak ho matan been kontente hodi festeza, tanba la espera bele iha referedun ba determinasaun hodi hakat ba restaurasaun independénsia, maske ema barak mak mate.
"Importante loos ba aniversáriu tinan 22, loron ida ke ha'u haree ho matan no sente rasik ema barak tanis tanba kontente, baibain ema tanis tanba triste ida ne'e ema tanis tanba kontente", dehan nia. (*)