Pergunta ne’ebé Husu Beibeik (PHB)

Imunizasaun iha kontestu pandemia COVID-19

Imunizasaun iha kontestu pandemia COVID-19 - Pergunta ne’ebé Husu Beibeik (PHB)

Hirak-ne’e akompaña ho OMS nia prinsípiu matadalan ba atividade imunizasaun durante pandemia COVID-19. Tuir lala’ok pandemia COVID-19 ne’e, PHB hirak-ne’e sei bele hala’o revizaun fila fali se presiza.      

Imunizasaun nu’udar servisu saúde importante hodi proteje indivíduu hodi moras ne’ebé bele prevene ho vasina (VPD). Liuhosi fó imunizasaun hirak-ne’e tuir tempu, ema no komunidade sira sei hetan protesaun nafatin no hamenus posibilidade surtu moras ne’ebé bele prevene ho vasina (VPD). Halo prevensaun ba surtu moras ne’ebe bele prevene ho vasina (VPD) la’ós de’it salva vida maibé presiza rekursu oituan de’it duké responde ba surtu no ajuda hatún todan ne’ebé sistema saúde infrenta ona tanba pandemia COVID-19. Maske kompromisu atu kontinua sistema imunizasaun, nasaun sira tenki uza aprosimasaun ne’ebé respeita prinsípiu labele-halo-moras (do-no-harm) no limita oportunidade tranzmisaun COVID-19 bainhira hala’o atividade imunizasaun. Vizita imunizasaun bele aproveita hanesan oportunidade sira atu fahe lia-menon ne’ebé bele enkoraja hahalok hodi hamenus risku tranzmisaun husi COVID-19, atu identifika sinál no sintoma moras COVID-19, no atu fó hanoin ba saida mak presiza halo bainhira sintoma ne’e mosu.           

Servisu ba imunizasaun

  1. Programa imunizasaun ba bebé sira presiza kontinua tuir planu durante tempu pandemia COVID-19 ka lae?

Sin, tanba partu iha fasilidade saúde tenki hala’o nafatin iha situasaun barak, vasinasaun ba bebé foin moris (ez. BCG, OPV, Hepatitis B) tenki sai nafatin prioridade ida no vasina sei fó tuir orário imunizasaun nasionál.

  1. Vasina ba adultu rekomenda ka lae durante pandemia COVID-19?

Nasaun sira ne’ebé ho programa imunizasaun ba pneumococcal, gripe, no pertusis ne’ebé eziste ona ba idozu no indivíduu ne’ebé ho kondisaun iha risku aas, tenki hala’o nafatin programa hirak-ne’e bainhira implementa hela medida atu hasees an hosi hada’et COVID-19, liuliu ba sira-ne’ebé iha risku-aas ba moras todan hanesan idozu sira. Prevensaun ba moras respiratóriu no baixa ba moras husi pneumococcal, gripe no pertusis liuhosi vasinasaun sei husik hela ekipamentu médiku, ai-moruk, no pesoál saúde sira disponivel hodi fó-tulun pasiente ho COVID-19. Maske agora daudauk ne’e informasaun kona-ba relasaun entre COVID-19 ho risku aas ba infesaun pneumococcal, vasinasaun ba pneumococcal bele prevene tantu infesaun baktéria primáriu no sekundáriu no konsumu ai-moruk antibiótiku ne’ebé la nesesáriu.           

  1. Vasina iha eskola fatin kontinua nafatin tuir planu durante pandemia COVID-19 ka lae?

Initisiativu vasina bazeia iha eskola bele kontinua nafatin se medida prevensaun no kontrolu infesaun implementa hodi hamenus risku hada’et COVID-19 entre estudante sira, funsionáriu eskola, no profisionál saúde. Vasina bazeia iha eskola ne’e nuudar dalan importante ida hodi vasina labarik no adolexente sira ba vasina oioin hanesan doze reforsu ba tetanu & difteria, vasina kontra sarampu-rubela, vasina kontra HPV, vasina meningococcal, no vasina ba tifus. Maibé, bainhira kampaña imunizasaun suspende temporariamente, tenki evita mós estratejia kampaña bazeia iha eskola; meius alternativa tenke uza hodi bele kobre labarik estudante sira ho vasina ne’ebé apropriadu ba sira-nia idade.       

  1. Iha medida ruma ne’ebé nasaun sira bele foti hodi fó protesaun ba fasilitadór imunizasaun sira hosi COVID-19 ka lae?

Sin, nasaun sira bele tuir matadalan ne’ebé rekomenda ona ba utilizasaun ekipamentu protesaun ba pesoál saúde ba moras virus corona (COVID-19) no konsiderasaun bainhira menus ekipamentu. Fó konsellu kona-ba oinsá uza máskara iha kontestu COVID-19, no enkoraja fasilitadór imunizasaun sira prátika ijiene liman beibeik hanesan hato’o ona iha Ha’u nia Momentu 5 ba Ijiene Liman. Sesaun vasinasaun sira tenki hala’o iha área ho ventilasaun di’ak no área hirak-ne’e tenki halo dezinfeta beibeik.     

  1. Iha dalan ruma atu organiza fatin servisu ba imunizasaun hodi hamenus risku hada’et COVID-19 ka lae?

Sin, iha dalan simples balun ne’ebé bele foti atu proteje ema ne’ebé ba simu vasina no fasilitadór vasina hasoru hada’et husi COVID-19, hanesan limita númeru ema ne’ebé marka prezensa bainhira ba imunizasaun no hala’o sesaun ki’ik liu ho frekuénsia intervalu barak liu. Estratéjia atu evita halibur ema barak liu maka hein iha sala hein nian maka inklui:

  • Organiza oráriu tuir tempu ba apontamentu ba imunizasaun
  • Organiza hamutuk atividade imunizasaun ho servisu esensiál saúde preventiva sira seluk, limita númeru ba sentru saúde ba ema ne’ebé atu ba simu vasina no fasilitadór vasina tuir idade ne’ebé apropriadu.
  • Se bele uza espasu iha liur, no halo tuir distánsia fíziku iha fasilidade saúde ka fatin ba vasina.
  • Establese sesaun imunizasaun ne’ebé fó de’it vasina ba idozu no sira ne’ebé ho kondisaun médiku saúde ruma (hanesan tensaun alta, moras fuan, moras respiratóriu, ka diabetes).

Se bele, servisu imunizasaun no fatin hein nian tenke keta-ketak husi servisu tratamentu kurativu (ez. Haketak oráriu atendimentu ka espasu depende ba fasilidade saúde ne’ebe iha).    

  1. Ema ne’ebé ho infesaun COVID-19 (konfirmadu ka suspeitu) bele simu vasina ka lae?

Sin, ohin loron, seidauk hetan kontra-indikasaun ruma ba vasina ema ne’ebé ho COVID-19.  

Atu hamenus risku hada’et COVID-19, ema ne’ebé suspeitu ka konfirmadu COVID-19 tenki izola no halo tratamentu tuir OMS nia matadalan.

Se ema ida ho kazu konfirmadu ka suspeitu ba COVID-19 la iha fasilidade saúde (ez. iha uma), nia asaun atu hetan imunizasaun bele aumenta da’et infesaun ne’e ba ema seluk. Ho razaun ida-ne’e maka, ema ne’e tenki hein to’o nia sintoma la iha ona mak bele vasina, di’ak liu se nia hetan ona teste negativu dala rua tuituir malu ba COVID-19 (hala’o entre parte oras 24). Se la iha posibilidade ba halo teste, OMS rekomenda adia oráriu vasina loron 14 depois sintoma lakon ona.

Se ema ida ho kazu konfirmadu ka suspeitu ba COVID-19 hala’o hela tratamentu iha fasilidade saúde (hanesan pasiente ne’ebé baixa) ema ne’e tenki hetan vasina tuir oráriu imunizasaun nasionál hafoin nia di’ak ona ka molok nia alta hosi ospitál, ho halo tuir medida prevensaun no kontrola infesaun.

Durasaun ba virus sai hosi isin ka hada’et ba ita nia isin iha kazu COVID-19 seidauk hatene loloos. Matadalan ida ne’e sei atualizadu se hetan ona estudu foun ruma.  

  1. Ema ne’ebé iha kontaktu besik ba kazu COVID-19 bele hetan vasina?

Sin, Ohin loron, seidauk iha medikamentu kontra-indikasaun atu vasina ema ne’ebé hetan COVID-19, se ema ne’e iha kontaktu besik ba kazu COVID-19 ne’e la hela iha fasilidade saúde (ez. iha uma), ema ne’e tenke kompleta auto-izolamentu loron 14 atu prevene risku hada’et COVID-19 ba ema seluk, Se kontaktu ne’e mak laiha sintoma ba COVID-19 hafoin auto-izolamentu loron 14, entaun ema ne’e bele hetan vasinasaun,

Se ema ne’ebé mak iha kontaktu besik ba kazu COVID-19 ne’e hetan tratamentu iha fasilidade saúde (ez. baixa) ema ne’e tenke hetan vasina tuir oráriu imunizasaun nasionál hafoin rekupera no molok alta, asume katak iha prevensaun ba infesaun no medida kontrolu respetivu.

  1. Se servisu imunizasaun hetan suspende ka hetan redusaun, nasaun presiza hala’o fali atividade imunizasaun?

Sin, Maske servisu rutina kontinua ona durante pandemia COVID-19, fornesimentu servisu bele la másimu, ka benefisiáriu sira labele hetan asesu ba servisu, Tanba ne’e, intensifikasaun ba servisu imunizasaun no ezijénsia atividade ne’ebé mosu maka sei sai prioridade,

Planu estratejia kona-ba hahú fali atividade vasina tenke hahú durante periodu suspende ba atividade imunizasaun, no la hein bainhira re-estabelesimentu, Revee rejistu ba vasina, lista padraun, no monitorizasaun ba bebé foin moris tenke hetan atualizasaun nafatin durante tempu suspensaun ka redusaun ba atividade imunizasaun no uza ba planu re-kompensa, Estratejia ba rekompensasaun nian bele bazeia ba epidemolojia lokál kona-ba vulnerabilidade surtu-VPD hanesan sarampu, pólio, difteria, pertusis, meningococcal, isin-manas-kinur; atividade bele inklui divulgasaun adisionál  no/ka sesaun movel ka hala’o intensifikasaun periódiku kona-ba servisu imunizasaun rutina (PIRIs).

Komite Konsultivu Tékniku Imunizasaun Nasionál tenke envolve atu fó konsellu Ministériu Saúde karik rekomendasaun ba modifikasaun polítika rekompensasaun nian (ez. ajusta polítika sira atu estende idade ne’ebé elijibilidade) ka revee oráriu imunizasaun (ez. interval mínimu entre doze vasinasaun nian).

  1. Durante pandemia COVID-19, iha atividade ne’ebé bele hala’o atu mantein komunidade sira hetan kona-ba vasina?

Sin, importante atu fó konfiansa ba servisu imunizasaun no sistema saúde, Mudansa ruma ba funsionamentu iha servisu imunizasaun durante pandemia COVID-19 tenke komunika klaru ba pesoál saúde no komunidade sira. Atu mantein komunidade nia ezijénsia ba servisu imunizasaun, estratéjia komunikasaun ne’ebé espesiálizada tenke implementa hodi fornese informasaun saúde ne’ebé loloos, hatán ba komunidade nia preokupasaun, hametin ligasaun ba komunidade no enkoraja utiliza servisu imunizasaun ne’ebé iha.

Pesoál saúde sira tenke hetan treinamentu atu dezenvolve abilidade kona-ba prevene no kontrola infesaun, maibé mós atu hadi’a sira-nia abilidade atu komunika mensajen importante ba kuidadór sira no komunidade kona-ba vasinasaun nu’udar serbisu saúde ne’ebé prioridade durante COVID-19, risku ba VPDs no benefísiu hosi vasina.   

Envolvimentu komunidade tenke inklui lideransa lokál iha atividade planeamentu rekompensa atu suporta sira-nia papél iha advokasia kona-ba vasina, atu informa ba komunidade kona-ba servisu ne’ebé hahú fali ona, no atu fó émfaze kona-ba importansia husi vasinasaun no catching up vasinasaun ne’ebé falta. Atu dirije estratéjia ne’ebé adapta ona ba atividade rekompensa nian, sei importante tebes ba nasaun atu monitoriza bareira ba vasina ne’ebé posivel iha públiku no grupu vulneravel sira.

  1. Se servisu imunizasaun hetan suspensaun ka redusaun, saida maka presiza atu komunika ba inan-aman ne’ebé preokupa ba sira-nia oan ne’ebé seidauk hetan vasina?

Bele informa ba inan-aman sira katak maske importante atu fó vasina tuir nia tempu, maibé presiza mós halo tuir matadalan husi governu nasionál no lokál kona-ba medida prevensaun COVID-19, inklui distánsia fíziku. Ida-ne’e signifika katak iha interupsaun temporária ba servisu imunizasaun. Iha biban ida-ne’e, importante atu fó konsellu ba inan-aman sira atu lori kedas oan sira ba vasina bainhira servisu programa imunizasaun hahú filafali. Inan-aman mós tenke asegura katak bainhira servisu imunizasaun hala’o fali maka pesoál saúde sira sei informa ba inan-aman sira kona-ba oinsá maka atu rekompensa fali doze ne’ebé falta.

  1. Se servisu imunizasaun suspende, bainhira maka bele hahú fali atividade imunizasaun?

Nasaun sei presiza atu estabele fali no vigór fali servisu imunizasaun iha tempu badak. Servisu imunizasaun ne’ebé hetan suspensaun tenke hahú fali kedas bainhira risku hada’et COVID-19 ne’e menus ona no kapasidade sistema saúde iha kbiit atu hahú fali servisu imunizasaun. Iha posibilidade katak sei iha risku hada’et COVID-19 bainhira hahú fali servisu imunizasaun. Presiza reinforsa medida ba prevensaun infesaun no kontrollu no prátika distánsia fíziku ne’ebé rigorozu iha área hein nian bainhira hahú fali servisu imunizasaun.

Iha prosesu preparasaun ba hahú filafali servisu imunizasaun, tenke dezenvolve no implementa estratéjia komunikasaun iha tempu apropriadu; estatéjia ne’e tenke informa no prepara pesoál saúde sira ho adekuadu, anúnsiu hahú filafali servisu imunizasaun ho klaru, no enkoraja komunidade sira atu hetan vasina.

Vijillánsia ba moras ne’ebé bele prevene liuhosi vasina

  1. Vijilánsia ba moras ne’ebé bele prevene liuhosi vasina tenke kontinua durante pandemia COVID-19?

Sin. Sistema vijilánsia tenke kontinua atu bele detekta antes no iha jestaun ba VPDs, mínimu liu ba moras hirak ne’ebé tama iha meta eradikasaun no eliminasaun no mandatu vijilánsia globál: polio, sarampu, tetanus neonatal, no, iha nasaun ne’ebé ho meta eliminasaun rejionál, rubela. Nasaun sira mós tenke fó prioridade ba vijilánsia ba VPDs ho potensiál epidemia; influenza, meningococcus, isin manas-kinur (yellow fever), tifus (typhoid), kolera, no difteria.  Vijilánsia ba VPD seluk tenke kontinua beibeik.

  1. Mudansa saida mak rekomenda ba vijilánsia VPD se pandemia COVID-19 la permite ba ezisténsia sistema vijilánsia VPD ne’ebé atu kontinua hanesan baibain?

Se sistema vijilánsia VPD ne’ebé eziste la bele kontinua hanesan normál, tenke identifika no mantein funsaun kritíku, hanesan vijilánsia ativu ba kazu grave flaccid paralysis, vijilánsia ba polio, vijilánsia ba surtu, no haruka amostra urjente no halo konfirmasaun laboratóriu ba VPD ne’ebé sai prioridade. Atu hamenus risku hetan ka da’et hosi COVID-19, vijilánsia ativu ba VPDs, hanesan polio bele kontinua ho númeru limitadu hosi ospitál prioridade sira, naran katak pesoál vijilánsia uza ekipamentu protesaun pesoál (PPE). Se ida-ne’e la posivel, vijilánsia ativu tenke hala’o ho maneira seluk (ez. liuhosi internet, telefone) bainhira posivel.

  1. Oinsá bele asegura kontinuasaun vijilánsia ba VPD bazeia ba laboratóriu?

Laboratóriu VPDs barak maka envolve iha teste ba virus ne’ebé kauza COVID-19. Se COVID-19 sai prioridade ba teste laboratóriu, amostra VPD tenke hetan iha laboratóriu refere karik iha garante katak ida ne’e sei la halakon kapasidade teste ba COVID-19 tanba reajente limitadu no kapasidade limitadu ba transportasaun internasionál. 

Enkoraja nasaun atu mantein nivel sufisiente ba kapasidade atu teste VPD, maske iha posibilidade ho menus frekuénsia ba teste VPD. Bainhira laiha posibilidade ba teste laboratóriu, tenke haloot amostra ho apropriadu ba konfirmasaun bainhira kapasidade laboratóriu permite. Nasaun tenke asegura kapasidade fatin haloot ne’ebé natoon iha nivel provinsiál no sentrál no monitoriza ho regulár. Algoritmu teste laboratóriu bele halo mudansa atu hatán ba nesesidade ba konfirmasaun laboratóriu. Liuliu ba posibilidade surtu sarampu, grupu foun bele hetan konfirmasaun liuhusi teste lima to’o sanulu ba kazu suspeitu sarampu.

  1. Oinsá vijilánsia COVID-19 bele integradu ho vijilánsia VPD ne’ebé eziste ona?

Bainhira posivel, sistema komprensivu ba vijilánsia VPD bele integradu ho sistema vijilánsia ba COVID-19, aproveita uza hamutuk infraestrutura ba kapasidade laboratóriu, sistema jestaun dadus, transportasaun amostra, no relatóriu. Integrasaun ho vijilánsia laboratóriu ba COVID-19 posivel atu rekolla amostra, transporte, no presesamentu (ne’ebé hanesan ho influenza no sarampu) no plataforma ba teste, no protokolu (ne’ebé barak liu mak uza PCR, utiliza RNA extraction kits no enzymes ne’ebé hanesan).

  1. Vijilánsia bazeia-komunitáriu tenke kontinua ka lae?

La enkoraja tebes atu halo vijilánsia komunitáriu tanba envolve vizitante barak ka sensibilizasaun grupu. Maske nune’e, bainhira hala’o ba polio, ema sira-ne’ebé hala’o vijilánsia ida-ne’e sei presiza relata kazu flaccid paralysis aguda no iha potensiál surtu no apela no enkoraja pasiente sira hodi bele hakbesik an ba ospitál ne’ebé besik, vijilánsia komunitáriu ba tétanu neonatal bele realiza tuir maneira seluk hanesan tuir telefone ka mensajen. OMS la rekomenda halo vijilánsia komunitáriu ba VPD sira seluk.

Kadeia korrente no fornesimentu

  1. Saida mak ita bele halo atu prevene vasina labele hotu durante no hafoin períodu pandemia COVID-19?

Produsaun vasina globál agora daudaun interrompe hela, ne’ebé halo tarde prosesu haruka vasina ba nasaun sira. Atu antisipa posibilidade ba interrupsaun fornesimentu, tenke asegura disponibilidade ba vasina pelumenus ba fulan tolu iha nivel nasionál. Se ida-ne’e la bele, tenki asegura disponibilidade vasina iha nivel sub-nasionál ba fulan tolu, se kapasidade armazein sei aguenta. Se lae, haruka vasina ba sub-nasionál beibeik, ezemplu, kada fulan ka depende ba nivel stók anterior.

  1. Asaun saida mak ita bele foti atu asegura disponibilidade ba vasina no fornesimentu relevante ba programa imunizasaun rutina iha nivel hotu-hotu?

Nasaun sira presiza halo previzaun rasionál ba vasina no sasan adisionál, bazeia ba konsumu antesipada husi kampaña no servisu imunizasaun rutina, nasaun sira presiza haforsa sistema monitorizasaun ba stók vasina hodi bele asegura katak antigents no diluents hotu sei disponivel natoon no tuir prazu ba validade no estatus monitór ba vasina vial. Importante mós atu, a) haree besik liu ba nivel stók adisionál (seringa no kaixa seguru) tanba bele uza sira ba objetivu terapeútiku bainhira sasán menus ona, b) asegura fornesimentu vasina iha nivel stók seguransa ne’ebé adekuadu, c) respeita agrupamentu vasina no produtu relasionadu seluk, no d) koordena ho ajénsia envolvida atu garantia lori produtu ba vasina tuir aviaun no roo bainhira servisu imunizasaun hahú filafali.

  1. COVID-19 nia test kits, reajente no suprimentu ba laboratóriu bele rai iha vasina kadeia korrente?

Sin, permite atu uza EPI kadeia korrente nu’udar armajenamentu apropriadu ba farmaseútiku sira ne’ebé sensitivu ba temperatura, ne'ebé inklui fornesimentu laboratóriu COVID-19, bainhira sira sei fó label ho loos, Iha sirkumstánsia hanesan ne’e, kadeia korrente ka ofisiál fornesimentu presiza asegura primeiru katak, sei iha kapasidade kadeia korrente ne’ebé adekuadu no husik-hela fatin temporáriu ba produtu laboratóriu hirak-ne’e, tau-label ho loloos no distinge husi vasina sira seluk.

  1. Oinsá nasaun sira bele avalia kapasidade aumenta ba sira-nia sistema kadeia korrente?

Nasaun sira presiza atualiza no mantein lista ba fasilidade hotu-hotu (públiku no/ka privadu) ho ekipamentu kadeia korrente ne’ebé funsiona atu asegura aumenta kapasidade (ez. abilidade ba sistema kadeia korrente atu rai influksu derrepente ba produtu sensitivu ba temperatura). Bele uza avaliasaun últimu nu’udar fonte ba dadus atu determina kapasidade ne’ebé iha, hanesan avaliasaun Jestaun Efetivu ba Vasina hosi WHO-UNICEF (EVM), Gavi Cold Chain Equipment Optimization Platform (CCEOP), ka ezersísiu mapamentu sira seluk ba kadeia korrente. Bainhira sira-ne’e laiha, presiza halo avaliasaun rápida atu garantia konfirmidade ba rekerimentu temperatura armazenamentu ba vasina.

  1. Iha dalan ruma atu minimiza todan ba armazenamentu kadeia korrente durante pandemia COVID-19?

Sin, nasaun sira bele modifika oráriu ba distribuisaun no reseita ba vasina bainhira presiza atu evita todan boot ba kadeia korrente. Bainhira apropriadu, vasina sira-é mak aloka ona kampaña vasinasaun ba masa, bele uza ba imunizasaun rutina. Programa sira-ne’e presiza konfirma ho fornesedór (sira) kona-ba disponibilade fornesimentu vasina no oráriu transferénsia sasán; disponibildade orsamentu alokasaun fundu presiza bazeia ba oráriu fornesimentu ne’ebé verifikadu.

Buat seluk

  1. Atividade sira seluk hanesan treinamentu kona-ba imunizasaun no peskiza kobertura sira presiza kontinua?

Atividade sira ne’ebé fasilita programa imunizasaun sira presiza konsidera ho didi’ak hasoru risku hada’et COVID-19, formasaun direta, ne’ebé tau-hamutuk ema iha grupu presiza suspende temporariamente bainhira sira la halo tuir rekomendasaun halo distánsia fíziku, bele utiliza ezisténsia plataforma saúde dijitál atu halo formasaun, asesu informasaun, no diálogu ho komunidade ne’ebé buka servisu imunizasaun, plataforma hirak-ne’e bele ajuda família refere ba fonte informasaun saúde ne’ebé apropriadu, ka servisu sosiál sira seluk.

  1. Introdusaun ba vasina foun presiza kontinua?

Introdusaun ba vasina foun ne’ebé planeadu presiza konsidera ho didi’ak no bele adia, Introdusaun ba vasina foun baibain inklui lansamentu ne’ebé mak la tuir rekomendasaun halo distánsia fíziku, aleinde, kapasidade asisténsia saúde provavelmente sei dezvia hosi COVID-19 no ezijénsia hosi komunidade sei menus ne’ebé la permite halo lansamentu introdusaun vasina foun ho susesu.

  1. Verifikasaun ba eliminasaun sarampu-rubela presiza kontinua durante pandemia COVID-19?

Ida-ne’e depende ba kontestu lokál. Atividade verifikasaun ba eliminasaun sarampu-rubela sei bele kontinua durante surtu COVID-19 maibé presiza tuir kapasidade prontidaun no responde nasaun nian ba COVID-19, ka se lae bele adia. Presiza inklui atividade verifikasaun ba sarampu-rubela ne’ebé demora iha planu rekuperasaun ba pós COVID-19

  1. Avaliasaun MNTE presiza kontinua durante pandemia COVID-19 (ezemplu, avaliasaun pré validasaun, avaliasaun peskiza no avaliasaun sira ba pós validasaun)?

Lae, kompromisu ne’ebé intensu no interasaun pesoál ne’ebé presiza durante avaliasaun hirak-ne’e, partikularmente entre komunidade no ekipa avaliasaun, atividade hirak-ne’e presiza adia no kontinua fali bainhira restrisaun halo distánsia fíziku laiha ona.

  1. Iha vasina ruma ne’ebé rekomenda ba profisionál saúde sira iha kontestu COVID-19?

Sin, tanba sei iha moras ne’ebé bele prevene liuhosi vasina, hanesan gripe no sarampu, ne’ebé sirkula iha nasaun laran ho COVID-19, profisionál saúde sira hotu presiza simu vasina tuir sira-nia oráriu nasionál.

  1. Iha vasina ruma hasoru COVID-19?

 

To’o agora, Pergunta ne’ebé Husu Beibeik hirak-ne’e, iha ona kandidatu vasina hamutuk 70 ne’ebé mak sei dezenvolve hela no iha klínika dahuluk ne’ebé koko uza vasina esperimentál hahú iha Marsu 2020. Ida-ne’e ba dahuluk iha istória katak foin liu de’it loron 60 entre sekuénsia jenoma virus nian no dezenvolvimentu ne’ebé aselera ba vasina. Maske nune’e OMS la espera sei hetan vasina ne’ebé seguru no efetivu ho disponivel hasoru COVID-19 molok fulan 18 bainhira pergunta no resposta sira-ne’e mosu.
Saida mak Corona Virus?

Pergunta ne’ebé Husu Beibeik (PHB) - Corona Virus

Saida maka virus corona?

Virus corona nu’udar família boot ida hosi virus sira ne’ebé bele kauza moras iha animál ka ema.  Iha ema sira, virus corona balu koñesidu bele kauza infesaun respiratóriu hosi isin—manas/ inus-metin baibain to’o moras grave hanesan Middle East Respiratory Syndrome (MERS) – Síndroma Respiratóriu Médiu Oriente no Severe Acute Respiratory Syndrome (SARS) – Síndroma Respiratóriu Agudu. Foin lalais ne’e deskobre virus corona ne’ebé kauza moras virus corona COVID-19.

Saida maka COVID-19?

COVID-19 nu’udar moras infesiozu kauza hosi virus corona ne’ebé deskobre foin lalais ne’e.  Ida-ne’e virus foun no moras ne’e seidauk hatene antes surtu ne’ebé mosu iha Wuhan, Xina, iha Dezembru 2019.

Saida mak síntoma sira hosi COVID-19?

Síntoma komún hosi COVID-19 maka isin-manas, kolen, no me’ar maran. Pasiente balun bele iha moras, inus metin, inus been, garganta moras no kabun moras. Síntoma sira-ne’e baibain kamán no dezenvolve neineik. Ema balu hetan infesaun maibé laiha síntoma no la sente moras. Ema barak (maizumenus 80%) rekupera hosi moras ne’e sein presiza tratamentu espesiál. Entre ema 1 hosi ema na’in-6 ne’ebé maka hetan COVID-19 sai moras grave no susar atu dada iis. Ema idozu sira, no ema hirak ne’ebé iha problema saúde seluk hanesan tensaun aas, problema ho fuan ka diabetes, iha posibilidade boot liu atu hetan moras grave. Ema ne’ebé iha isin-manas, me’ar no susar dada iis tenke hetan atensaun médiku.

Oinsá COVID-19 ne’e da’et?

Ema bele hetan COVID-19 hosi ema seluk ne’ebé iha ona virus ne’e.  Moras ne’e bele hada’et hosi ema ida ba ema seluk liuhosi turuk-oan hosi inus ka ibun ne’ebé da’et bainhira ema ho COVID-19 me’ar ka fani. Turuk-oan hirak-ne’e monu ba objetu ka superfisie (objetu ruma nia leten) iha ema nia sor-sorin. Hafoin ema seluk bele hetan COVID-19 bainhira kaer kona objetu ne’e, hafoin ka’er fali sira-nia matan, inus ka ibun.  Ema mós bele hetan COVID-19 bainhira dada iis turuk-oan hosi ema ne’ebé hetan ona COVID-19 ne’ebé me’ar no hasai turuk-oan bainhira sira me’ar. Tanba ne’e maka importante atu iha distánsia liu metru 1 ka liu hosi ema ida ne’ebé moras.

OMS avalia hela peskiza ne’ebé la’o daudaun kona-ba oinsá maka COVID-19 ne’e da’et no kontinua atu fahe deskobrimentu atuál.    

 

Virus ne’ebé kauza COVID-19 ne’e bele da’et hosi anin?

Estudu daudaun ne’e sujere katak virus ne’ebé kauza COVID-19 ne’e barak liu da’et liuhosi kontaktu direta ho turuk-oan respiratóriu nian duké hosi anin. Haree resposta antes kona-ba “Oinsá maka COVID-19 ne’e hada’et”

COVID-19 bele hetan hosi ema ne’ebé la hatudu síntoma?

Dalan prinsipál ba moras ne’e atu da’et mak liuhosi turuk-oan hosi ema bainhira me’ar.  Risku atu hetan COVID-19 hosi ema ne’ebé la hatudu síntoma ne’e ki’ik liu. Maibé, ema barak ho COVID-19 esperiénsia ho síntoma kmaan. Partikularmente ida-ne’e klaru iha faze inisiu hosi moras ne’e. Tanba ne’e maka iha posibilidade atu hetan COVID-19 hosi ema ne’ebé, purezemplu, iha me’ar kmaan no la sente moras. OMS avalia hela peskiza ne’ebé hala’o hela kona-ba períodu da’et hosi COVID-19 no sei kontinua fahe deskobrimentu atuál.    

Karik ha’u bele hetan COVID-19 hosi ema ne’ebé hetan ona moras ne’e nia fo’er?

Risku atu hetan COVID-19 hosi ema infetadu nia li’ur-fo’er katak ki’ik liu.  Enkuantu investigasaun inisiál sujere katak iha kazu balu virus ne’e bele mosu iha ema nia li’ur-fo’er, da’et tuir maneira ne’e la sai hanesan karatér hosi surtu ne’e.  OSM avalia hela perskiza ne’ebé daudaun ne’e hala’o hela kona-ba oinsá maka COVID-19 ne’e hada’et no kontinua atu fahe deskobrimentu atuál.  Tanba ida-ne’e risku ida, maske nune’e ida-ne’e nu’udar razaun seluk ida atu fase liman beibeik, hafoin ba sintina ka molok han. 

Saida maka ha’u bele halo atu proteje ha’u-nia an no prevene hada’et hosi moras ne’e?

Medida protesaun ba ema hotu

Alerta nafatin ba informasaun atuál kona-ba surtu COVID-19, informasaun hotu disponivel iha OMS nia sitíu (website) no liuhosi ita-nia autoridade saúde públiku lokál no nasionál.  Nasaun barak iha mundu ne’e maka haree ona kazu COVID-19 no nasaun balu esperiénsia ona surtu ne’e. Autoridade iha Xina no nasaun sira seluk iha ona susesu hamenus ka hapara sira-nia surtu ne’e.  Maske nune’e, situasaun ne’e labele halo prevee entaun akompaña nafatin informasaun atuál.

Ita bele hamenus ita-nia posibilidade atu afeta ka hada’et COVID-19 liuhosi prevensaun simples:

  • Fase ita-nia liman ho loloos no beibeik ho sabaun no bee ka uza dezinfetante.
    Tanbasá?
      Fase ita-nia liman ho sabaun no bee ka uza dezinfetante bele hamate virus ne’ebé belit iha ita-nia liman.
  • Maintein distánsia maizumenus metru 1 entre ita ho ema ruma ne’ebé me’ar ka fani.
    Tanbasá?
      Bainhira ema ida me’ar ka fani sira hasai líkidu balu hosi sira-nia inus ka ibun ne’ebé bele iha virus.  Se ita besik liu ba ema ne’e, entaun ita bele apaña líkidu ne’e, inklui virus COVID-19 karik ema ne’ebé me’ar ne’e hetan ona moras ne’e.
  • Evita kaer matan, inus no ibun.
    Tanbasá?
      Liman kaer barak objetu ruma nia leten no bele kaer kona virus.  Bainhira kontaminadu, liman bele transfere virus ne’e ba ita-nia matan, inus ka ibun.  Hosi ne’ebá, virus ne’e bele tama ba ita-nia isin no bele halo ita moras.
  • Asegura katak ita, no ema iha ita-nia sorin, halo tuir respiratóriu ijiene ne’ebé loos.  Ida-ne’e signifika katak taka ita-nia ibun no inus ho ita-nia liman-sikun ka uza tixu bainhira me’ar ka fani.  Hafoin soe kedas tixu ne’ebé uza tiha ona.
    Tanbasá?
    Líkidu ne’ebé ita hasai bele hada’et virus. Halo tuir respiratóriu ijiene ho loloos ita bele proteje ema seluk hosi virus hanesan inus metin, inus-been no COVID-19.
  • Hela iha uma se ita sente moras. Se ita iha isin-manas, me’ar no susar dada iis, buka asisténsia médiku no fó-hatene antes. Halo tuir instrusaun hosi ita-nia autoridade saúde lokál.
    Tanbasá? Autoridade nasionál no lokál sei iha informasaun atuál liu kona-ba situasaun ne’e iha ita-nia área. Informa antes sei permite ita-nia pesoál saúde sira hodi dirije ita ba iha fasilidade saúde ne’ebé apropriadu. Ida-ne’e mós bele proteje no prevene ita atu hada’et virus no infesaun sira seluk.
  • Atualiza nafatin kona-ba atualidade área ne’ebé COVID-19 mosu (iha sidade ka área lokál ne’ebé da’et barak). Se bele, evita halo viajen – liuliu se ita tama idade idozu ka moras diabetes, moras fuan ka pulmaun.
    Tanbasá? Ita iha posibilidade boot atu hetan COVID-19 hosi área ne’ebé COVID-19 da’et barak.

Medida protesaun ba ema ne’ebé iha ka foin hala’o vizita (loron 14 liubá) ba iha área ne’ebé afetadu COVID-19

  • Halo tuir matadalan ne’ebé esplika ona iha leten (medida protesaun ba ema hotu)
  • Izola-an ho maneira hela de’it iha uma se ita hahú sente moras, maske iha de’it síntoma kmaan hanesan ulun moras, isin manas kmaan (37.3c ka liu) no inus-been oituan, to’o ita rekupera. Se importante ba ita atu iha ema seluk hodi lori hahán ka atu sai ba liur, ez. Ba sosa hahán, entaun uza máskara atu evita afeta fali ba ema seluk.
    Tanbasá? Evita halo kontaktu ho ema seluk no ba fasilidade saúde sei permite fasilidade hirak-ne’e atu hala’o ho efetivu liután no ajuda proteje ita no ema seluk hosi posibilidade hetan COVID-19 no virus sira seluk.
  • Se ita iha isin-manas, me’ar no susar dada iis, buka konsulta kedas tanba ida-ne’e bele mosu infesaun respiratóriu ka kondisaun sériu sira seluk.  Kontaktu antes no fó-hatene ba ita-nia médiku kona-ba viajen ikus ne’ebé ita halo ka iha kontaktu ho ema ruma ne’ebé halo viajen.
    Tanbasá? Kontaktu antes sei permite ita-nia pesoál saúde sira dirije ita lalais ba fasilidade saudé ne’ebé apropriadu.  Ida-ne’e mós bele ajuda atu prevene posilidade hada’et hosi COVID-19 no virus sira seluk.

Oinsá posibilidade mai ha’u atu hetan COVID-19?

  • Risku ne’e depende iha fatin ne’ebé ita hela ba – no liuliu, iha fatin ne’ebé surtu COVID-19 ne’ebé mosu ba.
  • Ba ema sira iha fatin barak katak risku atu hetan COVID-19 ne’e sei ki’ik. Maske nune’e daudaun ne’e iha fatin barak iha mundu (sidade no área barak) ne’ebé moras ne’e hada’et hela. Ba ema hirak-ne’ebé hela, ka vizita ba área hirak-ne’e maka risku atu hetan COVID-19 aas. Governu no autoridade saúde foti asaun rigorozu bainhira identifika kazu foun ida hosi COVID-19. Asegura katak ita kumpre restrisaun lokál/ bandu kona-ba viajen, movimentu ka halibur malu. Koopera ho esforsu kontrolu moras sei hamenus ita-nia risku hodi hetan hada’et COVID-19.
  • Bele kontein no hapara ona surtu COVID-19, hanesan hatudu ona iha Xina no nasaun sira seluk. Enfelizmente, surtu foun bele mosu ho lalais. Tanba ne’e importante atu hatene situasaun kona-ba fatin ne’ebá ita hela ba ka fatin ne’ebé ita iha intensaun atu bá. OMS públika atualidade kona-ba situasaun COVID-19 loroloron iha mundu tomak.
  • Ita bele haree iha at https://www.who.int/emergencies/diseases/novel-coronavirus-2019/situation-reports/
  • Relatóriu situasaun Timor-Leste nian bele hetan iha – https://www.who.int/timorleste/emergencies/novel-coronavirus-2019/novel-coronavirus-(2019-ncov)-situation-reports

Ha’u tenke ta’uk kona-ba COVID-19?

Moras tanba infesaun COVID-19 normalmente kmaan, liuliu ba labarik sira no joven sira. Maske nunee, nia bele kauza moras ne’ebé grave: maizumenus ema 1 hosi ema na’in 5 ne’ebé hetan COVID-19 presiza tratamentu hosi ospitál. Tanba ne’e maka normál ba ema atu ta’uk kona-ba oinsá surtu COVID-19 afeta sira no ema sira ne’ebé sira hadomi.

Ita bele kanaliza ita-nia preokupasaun ba iha asaun hodi proteze ita-nia an rasik, ema ne’ebé ita hadomi no komundade. Dahuluk no importante liu entre asaun sira ne’e maka fase liman ho loloos no beibeik no prátika respiratóriu ijeine ne’ebé loos. Daruak, mantein informadu no halo tuir konsellu hosi autoridade saúde lokál inklui kualkér restrisaun/ bandu kona-ba viajen, movimentu no halibur malu.

Atu aprende liután kona-ba oinsá maka proteje ita-nia an iha: https://www.who.int/emergencies/diseases/novel-coronavirus-2019/advice-for-public

Sé maka iha risku atu bele hetan moras grave?

Enkuantu ita sei aprende hela kona-ba oinsá COVID-19 ne’e afeta ba ema, ema ne’ebé idade avansadu no ema ne’ebé iha kondisaun médiku antes (hanesan tensaun aas, moras fuan, moras pulmaun, kankru ka diabetes) sai nu’udar ema hirak-ne’ebé bele hetan moras grave duké sira seluk. 

Antibiótiku sira efetivu ba prevensaun ka tratamentu ba COVID-19?

Lae. Antibiótiku la funsiona hodi kontra virus sira, só bele funsiona ba infesaun baktéria. COVID-19 kauza hosi virus ida, entaun antibiótiku la funsiona. Antibiótiku sei labele uza hanesan dalan ba prevensaun ka tratamentu ba COVID-19. Só bele uza de’it bainhira iha instrusaun hosi médiku atu halo tratamentu ba infesaun baktéria. 

Karik iha aimoruk ka terapía ne’ebé bele prevene ka kura COVID-19?

Enkuantu medisina modernu, tradisionál ka ai-moruk uma nian bele fó-ksolok no alevia síntoma hosi COVID-19, laiha evidénsia katak ai-moruk ne’ebé iha daudaun ne’e bele prevene ka kura moras ne’e. OMS la rekomenda medikamentu ba an rasik ho kualkér ai-moruk, inklui antibiótiku, nu’udar prevensaun ka kura ba COVID-19. Maske nune’e, iha esprimenta klinikál balu ne’ebé hala’o daudaun inklui ai-moruk moderna no tradisionál. OMS sei kontinua fornese informasaun atuál bainhira iha ona dezkobrimentu klinikál.

Iha ona vasina, ai-moruk ka tratamentu ba COVID-19?

Seidauk iha. To’o ohin loron, seidauk iha vasina no ai-moruk antivirál atu prevene ka trata COVID-19. Maske nune’e, sira ne’ebé afetadu tenke simu atensaun hodi alevia sintoma. Ema ne’ebé ho moras todan tenke baixa. Agradese ba atensaun suportivu, tanba pasiente barak maka rekupera.  

Posibilidade ba vasina no ai-moruk espesífiku balun sei iha hela investigasaun laran. Ai-moruk hirak-ne’e hetan hela teste liuhosi esperimentu klinikál. OMS koordena esforsu atu dezenvolve vasina no ai-moruk atu prevene no trata COVID-19.

Maneira efetivu liu atu proteje ita-nia an no ema seluk hasoru COVID-19 maka fase-liman beibeik, taka ho liman-sikun ka uza tixu bainhira me’ar, no mantein distánsia pelumenus metru 1 ka liu hosi ema ne’ebé me’ar ka fani. (Haree medida báziku ba prevensaun hasoru virus corona foun).

COVID-19 ne’e hanesan SARS ka lae?

Lae. Virus ne’ebé kauza COVID-19 no ida-ne’ebé kauza surtu Síndroma Respiratóriu Agudu (SARS) iha 2003 iha relasaun ba ida-idak nia jenétiku, maibé moras ne’ebé maka sira hamosu lahanesan oituan.

SARS perigu liu maibé nia infesaun menus duké COVID-19. Laiha surtu kona-ba SARS iha fatin seluk iha mundu dezde tinan 2003.

Ha’u tenke uza máskara atu proteje ha’u-nia an?

Só uza máskara karik ita hetan moras ho síntoma COVID-19 (liuliu me’ar) ka halo hela tratamentu ba ema ne’ebé bele iha COVID-19. Másakra ne’ebé uza bele uza dala ida de’it. Se ita la moras ka la tau-matan hela ba ema ne’ebé moras entaun ita gasta de’it máskara. Maskra sai menus iha mundu tomak, entaun OMS apela ba ema atu uza máskara ho di’ak.

OMS fó konsellu ba uzu rasionál máskara médiku atu evita gastus la nesesáriu ba rekursu presiozu ne’e no maluzu hosi máskara (haree konsellu kona-ba uzu maskra).

Maneira efetivu liu atu projete ita-nia an no ema seluk hasoru COVID-19 maka fase-liman beibeik, taka ho liman-sikun ka tixu bainhira me’ar no mantein distánsia pelumenus metru 1 hosi ema ne’ebé me’ar ka fani. Atu hetan informasaun liután bele haree Medida báziku ba prevensaun hasoru virus corona foun.

Oinsá atu tau, uza, hasai no soe maskra ida?

  1. Fó-hanoin katak, máskara ida só uza de’it ba pesoál saúde sira, ema ne’ebé kuida saúde, no ema ne’ebé iha síntoma repsiratóriu, hanesan isin-manas no me’ar.
  2. Molok kaer máskara ne’e, fase-liman ho sabaun ho bee ka uza dezinfetante
  3. Foti máskara ne’e no haree didi’ak karik nakles ka iha koak ruma.
  4. Hatene parte ida ne’ebé maka parte leten nian (parte ne’ebé iha arame).
  5. Asegura katak parte ne’ebé maka parte li’ur nian (parte ne’ebé iha kór).
  6. Taka máskara ba ita-nia oin. Buti parte ne’ebé iha arame ka parte ne’ebé ninia ninin toos oituan atu nune’e bele ajusta ba ita-nia inus.
  7. Dada tun máskara nia parte kraik atu nune’e bele taka ita-nia ibun no ita-nia keixu.
  8. Depoizde uza, hasai tiha máskara ne’e; hasai nia tali elástiku ne’ebé ka’it ba tilun enkuantu hadook máskara ne’e hosi ita-nia oin no roupa, atu bele evita kona parte máskara ka superfisie ne’ebé kontaminadu.
  9. Soe kedas maskra ne’e ba iha lixu fatin hafoin uza.
  10. Fase-liman hafoin kaer ka soe máskara ne’e – uza dezinfetante, karik liman foer, fase ita-nia liman ho sabaun no bee.

Durasaun períodu inkubasaun ba COVID-19 to’o bainhira?

“Períodu inkubasaun” signifika katak tempu entre hetan virus ne’e no hahú iha síntoma moras. Estimasaun ba períodu inkubasaun ba COVID-19 purvolta hosi loron 1-14, barak liu durante loron 5. Estimasaun hirak-ne’e sei atualiza bainhira hetan dadus ne’ebé disponivel.

Ema bele afetadu ho COVID-19 hosi fonte animál?

Virus corona nu’udar família boot ida hosi virus sira-ne’ebé komún iha animál sira. Dalaruma, ema hetan infesaun hosi virus sira-ne’e bele da’et fali ba ema seluk. Nu’udar ezemplu, SARS-CoV asosiadu ho laku no MERS-CoV hetan da’et hosi kuda-kamelu. Posibilidade fonte animál hosi COVID-19 seidauk konfirmadu. 

Atu proteje ita-nia an, hanesan bainhira vizita ba merkadu animál moris, evita kontaktu direta ho animál hirak-ne’e no fatin hirak-ne’ebé iha kontaktu ho animál. Asegura atu prátika seguransa ba ai-han di’ak iha tempu tomak. Kaer na’an matak, susubeen ka animál nia orgaun ho kuidadu atu evita kontaminasaun hosi hahán matak no evita konsume produtu animál ne’ebé matak ka ladún tasak.

Ha’u bele hetan COVID-19 hosi ha’u nia animál haki’ak?

Enkuantu iha ona ezemplu katak asu ida infetadu iha Hong Kong, to’o loron ne’e, seidauk iha evidénsia katak asu, busa ka animál haki’ak sira bele transmite COVID-19. COVID-19 ne’e liuliu da’et liuhosi líkidu ne’ebé sai bainhira ema infetadu me’ar, fani, ka ko’alia. Atu proteje ita-nia an, fase-liman beibeik no ho loloos.

OMS kontinua monitoriza perkiza atuál kona-ba ida-ne’e no tópiku COVID-19 sira seluk no sei atualiza dezkobrimentu foun ne’ebé disponivel.

Durasaun tempu hira mak virus ne’e bele moris iha fatin (objetu oin ruma)?

Laiha serteza kona-ba durasaun tempu ba virus ne’ebé kauza COVID-19 moris iha fatin (objetu oin ruma), maibé nia hanesan virus corona sira seluk. Estudu sujere katak virus corona (inklui informasaun prelimináriu kona-ba virus COVID-19) bele dura iha fatin (objetu oin ruma) durante oras balun ka bele to’o loron balun. Ida-ne’e bele tuir kondisaun diferensa (ez. Tipu fatin (objetu oin ruma), temperatura ka umidade ambiente nian).

Se ita hanoin katak fatin ida bele infetadu, hamoos ho disinfetan simples hodi oho virus ne’e no proteje ita-nia an no ema seluk. Fase liman ho sabaun no bee ka uza dezinfetante. Labele kaer ita-nia matan, ibun, ka inus.

Simu pakote ruma hosi área ne’ebé iha ona relatóriu kona-ba COVID-19 ne’e seguru ka lae?

Loos. Probabilidade hosi ema ne’ebé infetadu kontamina ho sasán komersiál ne’e ki’ik no risku atu hetan virus ne’ebé kauza COVID-19 hosi pakote ne’ebé muda, lori, no vizivel ba kondisaun diferente no temperatura mós ki’ik. 

Karik iha buat balu ne’ebé ha’u labele halo?

Medida sira tuirmai ne’e nu’udar medida LA efetivu hasoru COVID-19 no bele iha estragus boot:

  • Fuma
  • Uza máskara dúplu
  • Uza antibiótiku (Haree pergunta 10 “karik iha ai-moruk ka terapía ne’ebé bele prevene ka kura COVID-19?”)
Iha kazu ruma, se ita iha isin-manas, me’ar no susar dada iis ba konsulta kedas atu redús risku infesaun grave mosu no konta ita-nia istória viajen resente ba ita-nia pesoál saúde.
Sorumutu ka eventu ne’e presiza ema barak oinsá hodi konsidera nu’udar “halibur ema lubun boot”?

Sorumutu ka eventu ne’e presiza ema barak oinsá hodi konsidera nu’udar “halibur ema lubun boot”?

Eventu desportivu internasionál hanesan Olimpíku ka Kopa Mundiál no mós eventu relijiozu internasionál hanesan partisipa iha peregrinasaun musulmanu ne’e konsidera nu’udar halibur ema lubun boot. Maibé, konferénsia no eventu sira-ne’ebé ki’ik bele mós konsidera tuir definisaun OMS nian halibur ema-lubun boot. Eventu ida konsidera nu’udar “halibur ema-lubun boot” bainhira númeru ema hamutuk barak liu ne’ebé iha potensiál atu aumenta presaun iha rekursu ba planu no responde hosi sistema saúde nian iha komunidade ne’ebé iha fatin refere. Ita presiza konsidera fatin no durasaun eventu nian no mós númeru partisipante sira, pur ezemplu: Se eventu ne’e hala’o loron balu iha nasaun illa ki’ik ida ne’ebé nia kapasidade sistema saúde limitadu no eventu ho partisipante kuaze rihun bele fó presaun boot ba sistema saúde, no bele konsidera nu’udar eventu “halibur ema-lubun boot”. Pelu kontráriu se eventu ne’e hala’o iha sidade boot nasaun ida-ne’ebé boot no rekursu ba sistema saúde adekuadu no durasaun oras balu de’it, nunee eventu ne’e la konsidera nu’udar eventu “halibur ema-lubun boot”.

Seráke OMS rekomenda katak halibur ema-lubun boot internasionál nian hotu kansela tiha tanba COVID-19?

Lae. Tanba halibur ema-lubun boot internasionál nian la hanesan, fatór sira ne’ebé konsidera bainhira determina se eventu bele kansela bele mós adia. Kualkér desizaun atu muda planu ba halibur hamutuk internasionál nian tenke bazeia ba avaliaaun risku no oinsá bele jere, no nivel planu eventu nian. Avaliasaun tenki envolve parseiru sira hotu iha eventu ne’e, no liuliu, autoridade saúde iha nasaun refere ka ho komunidade ne’ebé eventu hala’o ba. Autoridade no parseiru sira mak iha pozisaun di’ak liu atu avalia nivel estres nian ba eventu ne’ebé bele tau iha sistema saúde lokál no servisu emerjénsia – no karik nivel estres ne’e bele simu iha situasaun atuál ne’e.

  1. Fatór saida de’it mak organizadór no autoridade saúde sira tenki haree bainhira avalia se risku sira-ne’e bele simu ka lae?

Ba nasaun sira-ne’ebé atualmente seidauk iha esperiénsia oinsá COVID-19 da’et ba komunidade, konsiderasaun prioridade karik planu eventu halibur ema-lubun boot maioria aumenta risku virus sira tama ba nasaun ne’e no sai estabelesidu, no mós risku ba partisipante sira atu importa infesaun fila fali ba sira-nia nasaun no aumenta liután hodi hada’et globalmente. Bainhira halo avaliasaun ne’e, organizadór no sira-nia autoridade saúde nasionál ka lokál tenki rekoñese katak risku hosi importa COVID-19 ne’e naturalmente ligadu ho viajen internasionál. Sira mós tenki rekoñese katak la’ós realístiku ka dezejavel finalidade ba risku zero. Bainhira organizadór no autoridade saúde sira determina karik atu realiza halibur ema-lubun boot, sira tenki determina risku saida mak bele simu no medida adisionál saida mak tenki implementa atu hamenus risku sira-ne’e. Ba nasaun sira-ne’ebé COVID-19 hahú hada’et ona iha komunidade, konsiderasaun prinsipál maka hanesan:

  • objetivu iha kontrola ka pelumenus hamenus virus ne’e da’et iha komunidade/nasaun.
  • prevene partisipante sira hosi nasaun sira seluk ne’ebé hada’et ona ho COVID-19

Iha kada kazu, risku ne’e tenke konsidera bazeia ba kontestu karaktéristika COVID-19 nian ne’ebé koñesidu, forsa atu afeta, oinsá atu hada’et no medida efetivu atu prevene ka hamenus COVID-19 da’et. Presaun ne’e tau ona ba sistema saúde lokál hodi responde ba surtu COVID-19 no presaun adisionál ba halibur ema-lubun boot bele tau iha sistema no mós presiza tau iha konsiderasaun. Ita bele buka liután konsellu kona-ba saida mak atu haree iha OMS nia dokumentu Rekomendasaun xave planu prinsipál ba halibur ema-lubun boot iha kontestu surtu COVID-19, 14 Fevereiru 2020. Hare iha link tuirmai: https://www.who.int/publications-detail/key-planning

  1. Oinsá se ha’u-nia organizasaun laiha espesialista atu avalia risku COVID-19 ne’ebé iha ba ita-nia planu halibur ema-lubun boot?

Autoridade saúde públiku nasionál no lokál iha nasaun ne’ebé ita planea atu realiza halibur ema-lubun boot maioria iha koñesimentu hodi hala’o avaliasaun risku saúde. Se iha OMS nia eskritóriu iha nasaun refere, sira bele mós fó suporta peritu balu. Nune’e, eskritóriu OMS iha ita-nia parte iha mundu tomak. Ita bele hetan naran no kontaktu sira OMS iha nasaun ida-idak iha: https://www.who.int/about/who-we-are/regionaloffices

  1. Se ita kontinua halibur ema-lubun boot internasionál ida, saida mak ita bele halo hodi hamenus risku ba partisipante sira atu hetan COVID-19?

Promove fase liman, ijiene respiratóriu no distánsia sosiál iha eventu refere. Asegura ita iha númeru kontaktu emerjénsia partisipante hotu nian, inklui fatin ne’ebé sira toba durante

eventu ne’e. Ita tenki klarifika ba sira katak informasaun sirane’e sei fó ba autoridade saúde públiku lokál hodi kontaktu buka tuir lalais se iha partisipante ruma iha eventu ne’e hetan

moras COVID-19. Organizadór eventu ne’e presiza iha planu preparasaun ida se kazu iha partisipante ida ka liu mak hetan sintóma COVID-19.

Ida-ne’e tenki inklui izolamentu rápidu ba ema moras ne’e no sira-nia seguransa transferénsia ba fasilidade saúde lokál. Ita tenki konsidera se númeru partisipante iha eventu ne’e presiza hamenus, halo disponibilidade partisipasaun liuhosi video ka telekonferénsia no posibilidade halo triajen ba partisipante sira ho sintóma COVID-19 (mear, isin-manas, sente moras ) iha entrada ba fatin eventu ne’e. Ita bele hetan konsellu oinsá kada partisipante bele proteje sira-nia an no ema ne’ebé sira hadomi hosi COVID-19 iha link ne’e: https://www.who.int/emergencies/diseases/novel-coronavirus-2019/advice-for-public

  1. Iha-ne’ebé mak ha’u bele hetan liután konsellu kona-ba oinsá avalia no jere risku saúde bainhira halibur ema-lubun boot internasionál ida?

OMS prodús ona matadalan no mós formasaun kona-ba oinsá halo planu ba halibur ema-lubun boot. Matadalan no formasaun ne’e bele haree iha oinsá hala’o avaliasaun risku ida, planu no jere risku sira liuhosi parseria ho autoridade lokál sira:

https://www.who.int/emergencies/diseases/novel-coronavirus-2019/technical-guidance/points-of-entry-and-mass-gatherings

Ita bele hetan konsellu oinsá kada partisipante bele proteje sira-nia an no ema ne’ebé sira hadomi hosi COVID-19 iha link ne’e: https://www.who.int/emergencies/diseases/novel-coronavirus-

2019/advice-for-public

Pergunta & Resposta (P&R): Kona-ba COVID-19, Isin-rua, Partu no Fó-Susu

Pergunta & Resposta (P&R): Kona-ba COVID-19, Isin-rua, Partu no Fó-Susu

Serake inan sira-ne’ebé isin-rua iha risku aas hosi COVID-19?

Agora daudauk iha hela peskiza laran atu kompriende impaktu hosi infesaun COVID-19 ba inan isin-rua. Dadus limitadu, maibé daudauk ne’e laiha evidénsia katak sira iha risku aas ba moras grave kompara ho populasaun enjerál. 

Maibé, tanba mudansa ba sira-nia isin-lolon no sistema imunidade, ita hatene katak inan isin-rua bele hetan afeta maka’as ba infesaun respiratóriu. Tanba ne’e importante ba sira atu foti medida preventiva hodi proteje sira-nia aan hasoru COVID-19, no hato’o sintoma posivel sira (inklui isin-manas, me’ar ka susar dada iis) ba pesoál saúde sira.

OMS sei kontinua halo revizaun no atualiza informasun no konsellu ho evidénsia barak hodi sai disponivel.

Hau inan ne’ebé isin-rua hela. Oinsá hau proteje hau-nia aan hasoru COVID-19?

Inan isin-rua tenke hola medida preventiva hanesan atu evita infesaun COVID-19 hanesan mós ema sira seluk. Ita bele ajuda proteje ita-nia aan liuhosi:

  • Fase ita-nia liman beibeik ho kose dezinfetante ka fase liman ho sabaun ho bee.
  • Mantein espasu entre Ita-Boot ho ema seluk no evita aan hosi fatin ne’ebé iha ema grupu boot.
  • Evita kaer ita-nia matan, inus no ibun
  • Prátika ijiene respiratóriu. Ne’e signifika taka ita-nia ibun no inus ho ita-nia liman-sikun ka tisu ruma bainhira me’ar ka fani. Depois so’e kedas tisu ne’e ba lixu ne’ebé ho matan metin.

Se ita sente isin-manas, me’ar ka susar dada iis, ba konsulta kedas. Telefone ka fó hatene antes ba fasilidade saúde, no halo tuir instrusaun hosi ita-nia autoridade saúde.

Inan isin-rua no inan sira-ne’ebé foin partu –inklui ba sira-ne’ebé hetan infesaun COVID-19 – tenke bá halo tratamentu rutina.

Inan isin-rua bele halo teste ba COVID-19 ka lae?

Protokolu no elijibilidade ba teste muda beibeik depende ba fatin ne’ebé ita hela ba.

Maibé, rekomendasaun sira OSM nian katak inan ne’ebé isin-rua ho sintoma sira COVID-19 nian sei sai prioridade ba teste. Se sira iha COVID-19, sira sei hetan atendimentu espesiál.

COVID-19 bele pasa hosi inan ida ba nia bebé ne’ebé iha hela knotak ka bebé ne’ebé foin moris?

To’o agora ita seidauk hatene se inan ida isin-rua ho COVID-19 bele pasa virus ne’e ba nia ka’an-fuan ka bebé ne’ebé iha knotak ka partu ona. To’o agora, virus ne’e seidauk hetan ezemplu (sample) ruma hosi líkidu amniótiku ka susubeen inan nian.

Tratamentu saida maka tenki disponivel durante inan isin-rua no partu?

Inan isin-rua sira hotu, inklui sira-ne’ebé konfirmadu ka suspeitu ba infesaun COVID 19, iha direitu aas atu hetan tratamentu kualidade molok, durante no depoizde partu.

Ida ne’e inklui prenatál, partu, posnatál, intrapartu no tratamentu saúde mentál

Esperiénsia ida-ne’ebé partu ho seguru no pozitivu inklui:

  • Hetan tratamentu ho respeita no dignidade;
  • Iha prezensa akompañamentu ida durante partu
  • Komunikasaun klaru hosi parteira sira
  • Estratejia halakon moras apropriadu
  • Mobilidade durante hala’o servisu se bele, no pozisaun partu tuir hakarak

Se hetan suspeitu ka konfirmadu COVID 19, nune’e pesoál saúde tenke foti medida apropriadu hodi hamenus risku ba infesaun ba sira-nia an no sira seluk, inklui liman-moos, no uza roupa protejidu apropriadu hanesan luvas, bata no máskara médiku.

Inan isin-rua ne’ebé suspeita ka konfirmadu COVID 19 presiza partu liuhosi sezariana?

Lae. OSM fó konsellu katak sezariana só bele hala’o bainhira justifika ona medikamentu.

Modu partu tenke individualizadu no bazeia ba preferénsia inan nian hamutuk ho indikasaun obstériku.

Inan isin-rua ne’ebé hetan infesaun hosi COVID-19 bele fó-susu ka lae?

Sin.  Inan isin-rua ne’ebé hetan infesaun hosi COVID-19 bele fó-susu se sira hakarak. Maibé, tenke:

  • Pratika ijiene respiratóriu durante fó-susu, uza máskara se iha;
  • Fase liman antes no depois kous bebé;
  • Hamoos no hamoos ho ai-moruk (dezinfeta) ba objetu leten ne’ebé sira kaer ona.

Se hau hetan ona infesaun COVID-19 hau bele kous hau-nia bebé ne’ebé foin moris ka lae?

Sin, bele.  Kontaktu besik no antes, no fó-susu  eskluzivu tulun bebé ida ho dezenvolvidu liután. Ita tenke suporta atu:

  • Fó-susu ho seguru, ho ijiene respiratóriu ne’ebé di’ak
  • Kous bebé no isin kona malu
  • Toba hamutuk ho ita-nia bebé iha kuartu ida

Ita tenke fase-liman molok no depois kous ita-nia bebé, no mantein objetu nia leten ho moos.

Hau hetan infesaun hosi COVID-19 no sente isin-baruk atu fó-susu hau-nia bebé diretamente. Saida mak hau bele halo?

Se Ita sente isin-baruk atu fó-susu ita-nia bebé tanba infesaun COVID-19 ka moras komplikasaun sira seluk, Ita tenke suporta fó-susu ita-nia bebé ho seguru liu hosi dalan ida-ne’ebé posivel, disponivel no bele simu hosi Ita. Ida-ne’e bele inklui:

  • Susubeen espresandu (hois no tau iha fatin apropriadu hafoin bele fó ba bebé iha kualkér tempu)
  • Relaktasaun – Fó-susu ba bebe depoisde tempu balun liu tiha
  • Doasaun susu-been hosi ema seluk

 

.

Total visitors:2135118

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com