"Jornalista mak bele fahe informasaun importante no relevante, no promove debate hodi fó fatin ba parte hotu-hotu atu espresa sira nia hanoin rasik. Ida ne’e sei fó oportunidade ba sidadaun sira atu halo sira-nia opsaun ho momoos no responsabilidade. Interese públiku mak fó lejitimidade ba jornalizmu. Fortalese demokrasia signifika reforsa kualidade Komunikasaun Sosial", tenik Prezidente Repúblika, Francisco Guterres Lú Olo, iha salaun São Jose Katedral-Dili, Sesta (10/5).
Nia dehan, jornalista sira Konstituisaun tane aas liberdade imprensa no liberdade espresaun hanesan mensiona iha ninia artigu 40 no 41. Iha prosesu konstrusaun Estadu knaar média nian sai hanesan pilar ida ne’ebé importante tebes atu haforsa no haburas demokrasia, promove direitu umanu no haforsa dezenvolvimentu sustentável, justu, ekuitativu no inklusivu.
"Ita hakaat ona pasu lubun ida. Iha tinan 2014 ita aprova Lei Komunikasaun Sosiál no iha tinan 2015, ita harii Konsellu Imprenssa. Iha tinan 2017 ita aprova Kódigu Étika Jornalístika hodi promove liberdade de imprensa, liberdade de expresaun no asegura públiku nia direitu ba informasaun transparente no responsável. Ho kondisaum sira hanesan ne’e, sidadaun sira bele partisipa iha dezenvolvimentu tomak iha rai laran.