"Rezultadu plenária dahuluk hatudu realidade foinsa’e sira hasoru loroloron. Rezultadu ne’e sai parte husi realidade objetu ida, presiza argumentu lójiku hodi hatutan valór no prinsípius husi ema lubuk ida ne’ebé la haree maibé husik hela obra ne’e atu hatutan”, dehan Lú Olo bainhira hala'o aúdénsia ho Parlamentu Foinsa'e iha palásiu Prezidénsia Repúblika, Bairopite, sesta (14/01).
Relatóriu ne'e aprezenta husi Membru Parlamentu Foinsa’e no akompaña direta husi Sekretáriu Estadu Juventude no Desport (SEJD), Abrão Saldanha ba Xefe Estadu.
Durante iha audésia, Prezidente Repúblika, Francisco Guterres ‘Lú Olo’ hatete, pozisaun Prezidente Repúblika hanesan aman ba nasaun hamutuk ho Orgaun Soberanu sira seluk iha relasaun ba malu no buat ne'ebe foinsa’e sira aprezenta ne’e atividade estadu tomak nian.
Tanba Estadu sempre hola medida ba foinsa’e sira, maibé solusaun ne’ebé importante liu mak tenke iha solusaun estruturante.
Delegasaun Parlamentu Foinsa'e, Nedichya Corriea Belo hatete, relatóriu ne’ebé produz husi membru Parlamentu Foinsa’e sira ne'e hala'o iha postu administrativu 63 no sub-rejiaun 2.
Peskiza ne’ebé Parlamentu Foinaa'e sira halo ne'e mak oinsá buka hatene envolvimentu juventude sira nian iha prosesu dezenvolvimentu, no identifika dezafiu no susesu ne’ebé juventude sira hasoru.
"Enkontru ho orgaun soberanu sira, no ohin halo enkontru ho Prezidente Repúblika parte ida halo interasaun ho orgaun Estadu sira hotu hodi aprezenta kestaun pertinente kona-ba foinsa’e sira-nia problema identifikadu husi peskiza”, dehan nia.
Sekretáriu Estadu Juventude no Desportu, Abrão Saldanha hatete, Parlamentu Foinsa’e estabelese liuhusi Rezolusaun Governu númeru 23/2009 hanesan espasu ka forum aprendizajen no ezersísiu sidadania ho objetivu dezenvolve joven sira-nia sensibilidade sosiál.
"Tanba ne’e mak ohin ha’u akompaña sira mai hato’o sira-nia rezultadu peskiza ba Prezidente Repúblika tanba Xefe Estadu iha majistratura de influénsia hodi hatutan sira-nia preokupasaun ba orgaun sira seluk”, afirma nia.
Tanba ne'e, Sekretáriu Estadu Juventude no Desportu sei konvida Prezidente Repúblika atu marka prezenza iha enseramentu formasaun ba Parlamentu Foinsa’e ne’ebé sei hala'o iha tinan 2022 ne’e. (*)