"Ohin iha lansamentu lian kórea iha Baukau, lansamentu ne'e foin primeiru ita loke, ba kandidatura ne'ebé atu tuir formasaun 142 iha ne'e," dehan SEFOPE, Alarico de Rosario, iha CDC Triloka Baukau, segunda (16/05).
Formasaun lian kórea durante fulan-6 hahú iha fulan-maiu to'o outumbru tinan-2022 hafoin tuir ezame.
Formasaun ne’e, prioridade ba traballadór peskas no fábrika, maibé lian korea rasik lian ne'ebé konsidera difísil iha mundu, tanba ne'e husu formadu sira atu vontade hodi aprende, nune'e bele liu iha ezame atu ba servisu iha korea do súl.
"Espera katak, ema tuir formasaun ne'e, sai di'ak, tanba SEFOPE nia papél ida mak oinsá atu hadi'a ema nia moris," nia argumenta
Kada tinan Governu Timor-Leste haruka traballadóres timor-oan ba servisu iha korea na'in-500 tuir nesesidade empreza sira iha korea.
"Foin dadauk iha dezembru liu ba kotuk, ha'u ho ékipa ba enkontru iha korea, sira aumenta tán kouta oituan, maibé ita la hatene, atu hira-hira," nia hatete
Hahú husi tinan-2009 to'o ohin loron, traballadóres Timor-oan ne'ebé servisu iha korea hamutuk rihun rua-resin.
Prezidente Autoridade Munísipiu Baukau, Olivio Freitas, hatete, traballadór ne'ebé ba ona servisu iha korea, sei hetan esperensia iha aspetu oin-oin, nune'e bainhira fila bele implementa hikas iha Timor.
Tanba ne'e, enkoraja formadu na'in-142 bainhira liu ezame ba servisu iha korea, tenke prepara kapasidade, rai osan, nune'e fila mai, bele halo mudansa ba rai rasik.
"Lia menon ida ba ita boot sira, bainhira liu, ba servisu halo di'ak, kumpre regras lei nasaun nian, regras kompaña nian atu bele servisu to'o rohan," nia enkoraja
Nune'e, formada, Nivia Joania da Silva, hatete, tuir formasaun lian korea hakarak atu ba servisu iha nasaun korea súl hodi bele hadi'a ekonomia uma laran.
"Prepara ona atu tuir formasaun lian korea nian, étika moral sira para ba ema nia rai menilai ita karik di'ak," nia hatete (*)