Asisten fura bee husi kompaña agua, Fernando de Jesus, esplika, perfurasaun ne'e to'o metru 79.4, hafoin hetan bee moos no nia aas iha rai laran to'o metru 57.31, debitu ne'ebé tuda sai pur-segundu liu litru-5.
Perfurasaun ne’e, servisu pakote husi Militár Austrália ho nia ajénsia, F-FDTL hamutuk ho kompaña, ne’ebé dahuluk buka uluk bee hafoin halo perfurasaun.
"Ne'e servisu pakote, programa Militár, primeiru faze sira buka bee, segundu faze fura, terseiru faze mak instalasaun, maibé ne'e seidauk hatene, ami mak halo instalasaun ou keta halo ema seluk mak mai fali," dehan nia hafoin remara perfurasaun bee iha área Kaisidu Baukau, kinta (19/05).
Bee moos ne’e, iha kualidade di'ak, nune'e komunidade bele konsumu ona ba nesesidade umanu, tuir kompaña agua HO² bee moos ne'e, sufisiente ona ba populasaun iha área Kaisidu.
Nune'e, Xefe Suku Trilolo, Ricardo Ernesto Belo, sente kontenete ho prefurasaun bee, tanba bele responde ona preukupasaun ne'ebé durante povu Kaisidu hasoru.
"Hanoin ida ne'e sufisiente ga lasufisiente, depende depois halo kanalizasaun," nia argumenta
Atu bee moos ba to’o iha komunidade, parte suku sei hanoin kona-ba kanalizasaun, tanba seidauk hatene ba prosesu kontinuasaun ba kanalizasaun nian.
"Ita haree took, sira mak la'o nafatin ou Governu mak la'o, depende Governu mak haree prosesu ne'e, sé bee barak liu, entaun ba uma ka’in tomak, sé bee mak oituan, ita la'o tuir nafatin ne'ebé mak iha," nia hatete
Entretantu uma ka’in iha área Kaisidu pur-volta 400 ho nia totál populasaun hamutuk 2.000. (*)