Tuir Komandu F-FDTL liu husi komisaun rekrutamentu, loke vaga hamutuk 87 ba sidadaun sira ne'ebe ho kualifikasaun akademika licensiatura no masteradu (S1 no S2). Nune'e sidadaun ho grau akademiku, licenciatura hamutuk 1.883, bacharelato 197 no mestradu 68 mak submete ona dokumentus.

"Ohin loron ami komisaun rekrutamentu informa ba públiku katak, vaga F-FDTL nia ne'e aplikantes hamutuk 2,350 mak submete ona dokumentus, feto hamutuk 413 no mane hamutuk 2.117 no iha área licenciatura hamutuk 1.883, bacharelato 197 no mestradu 68", dehan kordenador 1 ba komisaun rekrutamentu F-FDTL 2023, Nuno Carvalho dos Santos iha KJ Fatuhada, Tersa (24/10).

Prosesu rekrutamentu espesial ne’e iha parte haat inklui ho pre-selesaun, iha pre-selesaun ne’e komisaun sei verifika de’it bazeia ba kriteria, no haree liu ba aplikante sira nia idade, dokumentu komprovativu sira nia no inan aman nia inklui sira nia kurikulum vitae (CV).

Bainhira dokumentu hirak ne’e laiha, automatikamente sira elimina, tanba ne'e iha loron 6 fulan-novembru mak sei fo sai ba públiku se mak pasa iha pre selesaun dokumentu.

"Nune'e selesaun dokumentu sei hahú iha loron 15 fulan-novembru, teste saúde iha 17, teste fíziku iha 20 no entrevista iha loron 27", nia informa.

Prosesu selesaun ne'e sei ajuda husi méritu sira iha instituisaun Universidade Nasional Timor Lorosa’e (UNTL), Ministeriu Saúde (MS), kompañia AERO Dili no mos Ministeriu Justisa (MJ) inklui ministreiu relevante sira ba kada área ne'ebé komisaun rekrutamentu presiza.

"Tanba rekrutamentu ida ne’e bazeia ba méritu, entaun iha habilitasaun literaria ne’e painalista sira husi liur mak sei mai ajuda ami, ba área espesialidade ne’ebé ami buka hanesan masteradu no doutoramentu sira mak sei mai ajuda ami halo selesaun", nia akresenta.

Entretantu antes ne’e, aplikante hamutuk 5.565 mak foti formulariu hodi prense, maibé 2.350 de’it mak submete sira nia dokumentu. (*)