Tuir informasaun ne’ebé www.tempotimor.com asesu iha pájina Minitériu Finansas segunga (06/06) katak, reuniaun ne’ebé halo iha loron 06 juñu, Ministru Finansas, Rui Gomes, ne’ebé hetan akompaña husi Diretór Jerál Planeamentu no Orsamentu, Jose Alexandre de Carvalho, Diretór Gabinete Apoiu Jurídiku, Isac Menezes no Diretór Nasionál Planeamentu, Salomão Yoaquim no Asesór sira.
Tanba tuir kalendáriu, iha loron 6 fulan-juñu Parlamentu Nasionál liuhusi Gabinete Prezidente Parlamentu Nasionál sei haruka diploma ne’e ba Gabinete Prezidénsia Repúblika hodi entrega ba Prezidente Repúblika, José Ramos-Horta atu tetu.
Nune’e, Governu konklui ona faze Planeamentu ne’ebé mak hanesan faze dahuluk husi prosesu elaborasaun OJE 2023 tuir espíritu Lei Foun Enkuadramentu Orsamentál ne’ebé mak Prezidente Repúblika sesante, Francisco Lú Olo promulga ona iha fulan-fevereiru liubá.
Tuir-mai Governu sei kontinua ba Faze Preparasaun Orsamentu ne’ebé sei hahú ho Reuniaun Anuál entre Governu no Parseirus Dezenvolvimentu (TLDPM) ne’ebé sei realiza iha loron 10 fulan-juñu molok hakat ba Jornada Orsamentál iha loron 30 fulan-juñu 2022.
Iha ne’e mós Governu prepara kalendáriu preparasaun OJE 2023 bazeia ba Lei Enkuadramentu Orsamentál mak iha loron 10 Juñu, Governu sei halo reuniaun ho Timor-Leste Development Partners Meeting (TLDPM).
Nune’e mós iha loron 30 Juñu, Jornada Orsamentál, iha 15 Jullu:
Konsellu Ministrus aprova Tetu Desagregasaun Orsamentu, iha loron 20 Jullu Ministériu Finansas fó sai Sirkulár preparasaun OJE 2023 no Distribuisaun Tetu Desagregadu.
Iha loron 17 Agostu, Konsellu Ministrus aprova alokasaun orsamentu tuir Programa, ba 15 Setembru, Konsellu Ministrus aprova Proposta Lei OJE 2023, no loron 01 Outubru: Governu aprezenta Proposta Lei OJE 2023 ba Parlamentu Nasionál. Ba fulan-novembru, hahú Diskusaun Proposta OJE 2023 iha PN, no iha loron 15 Novembru, Votasaun Proposta OJE 2023 iha PN.
Tama ba fulan-dezembru, Parlamentu Nasionál sei haruka lei OJE 2023 ba Prezidente Repúblika atu haree hodi promulga Lei OJE 2023, hodi kontinua halo Publikasaun Lei OJE 2023 iha Jornal da Repúblika. (*)