Maibé, SEKOOP, Elizário Ferreira nia intervensaun katak, kooperativa CU-BALIMA konsege hasa’e númeru membru, maibé rendimentu menus tebes.
"Parabéns ba CU-BALIMA ne'ebé ohin halo asembleia jerál katak, kooperativa ne'e funsiona, maibé bainhira la halo Assembleia Jerál no la ko'alia ba malu ne'e, prepara atu lulun biti, tanba haree husi kresimentu membru imi masimu, maibé haree husi kresimentu kapitál imi sei minimu, entaun buka atu adere ba Federasaun Hanai Malu", dehan iha Salaun tokodede, Kuarta (18/01).
Tanba ne'e, nia fo obsaun ba Kooperativa CU-BALIMA atu adere ba Federasaun Hanai Malu (FHM) hodi hakbi'it kooperativa nia finansiamentu.
Tanba, iha tinan 2003 koperativa ne'ebé barak liu iha timor husi Munisípiu Likisa hamutuk 36 inklui federasaun ida, maibé dadaun laiha hotu ona.
"36 ne'e mós agora hela rua ka tolu de'it, kooperativa ne'ebé apoiu hela de'it sei mate, maibé kooperativa ne'ebé husi ki'ik ba boot sei buras ba nafatin eh sustentavel no CU-BALIMA hatudu ida ne'e", dehan nia.
Nune’e, Dirijente CU-BALIMA, Frangelina Amelia afirma, realiza Asembleia Jerál ne'e oportunidade ida atu membru sira halo krítika no hato’o sujestaun ne'ebé di'ak hodi bele kontribui ba sustentabilidade instituisionál finanseira iha CU-BALIMA.
"Asembleia ida ne'e nu'udar sorumutu ba daruak iha kreditu Uniaun Bazartete Likisa Maubara (CU-BALIMA) no atu fo hanoin ba membru no maluk partisipante sira katak, oportunidade ne'ebé livre no demokrasia atu aproveita didiak hodi halo avaliasaun apresiasaun ba relatóriu jestaun kontas ezersísiu CU-BALIMA ba tinan 2021-2022 nian ne'ebé sei hato'o liu husi power point", nia enkoraja.
Tanba ne’e, husu membru sira atu labele nonok iha prosesu avaliasaun ba servisu koperativa CU-BALIMA nian, liu husi realizasaun asembleia jerál.
"Signifika ita mai iha ne'e, la'ós nonok rona de'it depois fila ba tiha uma mak muramura", nia afirma.
Nia konta tuir, kooperatiza CU-BALIMA nia ezisténsia ho de'it membru 29, maibé to'o tinan 2023 totál membru hamutuk 200-resin no ho nia orsamentu rihun US$25 ona. (*)