Tuir komunikadu ne'ebé www.tempotimor.com asesu, iha reuniaun ne’e, ekipa peskizadór hato’o rekomendasaun hamutuk 12 ne’ebé elabora husi konsultasaun no observasaun direita ho membru kooperativas iha munisípiu 8.

Ekipa peskizadór mós hato’o felisitasaun ba governu foun no Sekretáriu Estadu Kooperativas foun ba periodu 2023-2028.

Durante diskusaun, ekipa peskizador apresia tebes ho kuñesimentu no esperiénsia ekipa SEKOOP nian, tanba pertinente tebes ho objetivu konsultória hodi bele halo kooperasaun iha futuru.

Tanba konteúdu husi konsultasaun, rezultadu ho rekomendasaun sira ne’ebé aprezenta, la ses husi programa governu dasia konstitusionál nian, liu-liu prioridade sira ne’ebé sei implementa iha futuru. 

Tuir sira, kooperativa produsaun mak krusial tebes ba baze ekonomia família, komunidade no nasaun.

Nune’e kooperativa produsaun atu la’o ho di’ak presiza konsidera pilar agroekolojia tolu ne’ebé sai baze ba dezenvolvimentu sustentavel mak hanesan sosio-kultura, ekonomia no protesaun natureza inklui rekursu lokal sira.

Alende ne’e, sistema kooperativa mós bele hola parte sistema edukasaun iha Timor-Leste, ezemplu “Rural Livelihood School” ho baze agroekolojia ne’ebé utiliza sabedoria lokal sira, sistema agro-florestal, konservasaun bee, sistema irigasaun, enerjia renovavel, kultivasaun frutas no sistema agrikultura integradu. (*)