Iha abertura ba espozisaun ne'e, SEKoop Elizário Ferreira dehan, objetivu husi expozisaun ne'e, atu komemora loron aniversáriu Falintil nian ba dala 45.
“Objetivu husi feira ida ne'e, primeiru atu komemora loron Falintil nian ba dala 45 nian, tanba ne'e maka ohin hahú ne'e, hahú kedas ho múzika rua hodi oferese ba loron Falintil nian," hatete Elizário Ferreira iha abertura atividade feira iha eis Hely Port Lanud, Ai-tarak laran, Kinta (20/08)
Elizário hatutan, alende husi komemorasaun tinan 45 ezisténsia Falintil, atu promove mós produtu kooperativa nian no mikro pekena empreza sira nian ba sosiedade atu bele hatene.
"Sé Timoroan la hadomi nia produtu rasik, sé tan mak atu hadomi, no la'ós ohin, bainhira tan. Tanba ne'e hadomi ita-nia povu, mai ita servisu hamutuk, servi ita -nia povu, promove sira-nia produtu rasik”, dehan Elizário.
Iha fatin hanesan, Prezidente Komisaun Organizadora ba espozisaun ne'e, Marça Maria dos Reis dehan, kooperativa kiik sira ne'ebé partisipa iha espozisaun liu ema na'in 80.
"Kooperativa kiik sira ne'e mai husi grupu feto kretaivu, Asosiasaun Mariñeiru Timor-Leste (AMTL), Kooperativa Kafé Timor, Kréditu Uniaun, Furak Aban Iha Liman Rasik (KU-FALIRA), Movimentu Kamponezes Timor-Leste (Mokatil), Sira ne'e iha balu mós hatudu sira-nia kreatividade kona-ba arte nian, grupu ida husi Likisa ne'ebé hatudu produtu kona-ba transformasaun tasi-been ba bee-moos, no maioria entre sira, mai husi Díli laran hamutuk ema nain 80-resin mak partsipa," informa nia.
Espozisaun ne'e realiza tanba hetan apoiu fundus husi parseiru dezenvolvimentu sira hanesan Heineken, Telemor nomós BNCTL, no espozisaun ne'e rasik hala'o durante loron sanulu, komesa iha 20 Agostu no sei ensera iha loron 30 Agostu.
PUBLISIDADE HUSI MOP FO PARABENS BA LORON FALINTIL