"Barak liu laiha kapitál atu dezenvolve sira-nia atividade kooperativa nian, nune'e barak liu husu kona-ba oinsá kria kondisaun ba sira hanesan sede no kompleta ekipamentu", informa SEKoop Elizário Ferreira, hafoin soru-mutu ho SEAK, SEJD no SEIJ, iha Akait, Segunda (07/09).

Nia hatutan, durante tinan barak, kooperativa sira iha munisípiu haat ne’e enfrenta mós problema kona-ba laiha formasaun, tanba sira fraku iha kontabilidade oinsá atu jere no halo jestaun di'ak ba sira-nia kooperativa, inklui mikro pekena empreza no emprezáriu lokál balu ne'ebé husu atu fó formasaun.

"Formasaun ne'e sai hanesan prioridade SEKoop, tanba kooperativa ne'e hahú ho edukasaun, dezenvolve ho edukasaun, kontrola ho edukasaun, dependénsia totalmente ba edukasaun", hatete nia.

Elizário dehan, programa prioridade seluk maka haforsa no kondisiona kooperativa atu sira bele funsiona hanesan instituisaun hodi kontribui ba dezenvolvimentu ekonómiku iha nivel rurál nian.

Nia relata, durante vizita ba munisípiu haat iha parte leste, kooperativa ne'ebé sei eziste maka kréditu inklui pekuária ne’ebé ema bolu dehan kooperativa produsaun, maibé iha barak mós lamenta kona-ba kondisaun sede. (*)