Deklarasaun ne'e nia hato'o, bainhira partisipa iha selebrasaun loron internasionál Feto-Rurál ho tema nasionál "Investe iha ekonómia Rurál sei hamosu Rezisténsia no bele aselera dezenvolvimentu inkluzivu", iha munisípiu Likísa, suku Dato no Loidaha.
Elizário hatete, liga ho tema ne'ebé iha, kooperativa iha nia ramu hamutuk 14, no ida ne'ebé relasaun ho agrikultura, iha ramu ida mak responsável ba Kooperativa Agrikula, ne'ebé kabe ba kooperativa hotu-hotu.
"Ami nafatin nakloke no husu ba Inan-Feton sira atu bele hola parte iha vida kooperativa, i parte Sekretária Kooperativa prontu atu apoiu formasaun, fasilitasaun no kondisiona", hateten SEKoop Elizário Ferreira iha Likísa, kinta (15/10).
Nia informa, kooperativa hamutuk 214 ne'ebé eziste iha TL, kooperativa kréditu mak hatudu dezempeñu di'ak liu, no funsiona hanesan instituisaun, maibé seluk la eziste ona.
Maske nune'e, nia dehan, sira iha papél hanesan kooperativa, tenta nafatin atu eduka, tanba prinsipiu internasionál da-lima husi kooperativa nian mak, formasaun, edukasaun no informasaun.
"Ida ne'e, katak saida? ami la fó osan, kooperativa la eduka ema atu fahe osan ba malu. Maibé, eduka ema oinsá atu kria kondisaun", nia haktuir.
Nia dehan, bainhira SEKoop fó ona kail, sira sei akompaña oinsá hakail ho di'ak. Sé SEKoop la akompaña ema atu hakail ho di'ak, ema sei la hakail ho di'ak.
"Sé imi hahú atu hakail ikan, ró laiha, SEKoop bele kondisiona oinsá iha ró bele kail. Sé imi hakarak han ikan, ami fó kail, ami sei la fó ikan", dehan nia. (*)