Serimómia simu posse ne'e hala'o iha sede suku Leorema, postu administrativu Bazartete, munisípiu Likisá, Sábadu (05/12).

Prezidente Kooperativa Kréditu Uniaun Estrela, Emanuel Lobato agradese ba konselleiru sira, ba xefi suku no aldeia sira no ba komunidade sira iha suku Leorema, tanba fó ona konfiansa ba nia hodi lídera hamutuk ho membru sira lori kooperativa la’o ba oin.

Maske nune'e, nia nafatin husu apoiu ba hotu-hotu nia servisu hamutuk hodi haburas, habelar no haboot liu tan kooperativa uniaun kréditu estrela no defende interese ema hotu nian iha kooperativa nia laran hodi kontinua ba jerasaun sira hotu.

"Ami hakarak atu dehan, ne'e la'os oportunidade, maibé ne'e responsábilidade. Responsábilidade ne'e atu la'o, ita hotu nia servisu, ezíje ita hotu nia papél", Emanuel Lobato hateten iha diskursu durante serimónia posse iha sede suku Leorema.

Aproveita okaziaun, nia mós hakarak agradese ba governu TL, liuhusi SEKoop ne'ebé aseita ona Leorema oan tomak nia pedidu, hodi fasilita sira liuhusi sensíbilizasaun no formasaun oinsá haklean sira nia koñesimentu iha área kooperativa.(*)