“Setór importante mak hanesan minerais, turizmu no ida seluk mak agrikutura. Durante tempu naruk ne’e ita nia kolokasaun orsamentu ne’e ba liu intraestrutura báziku ne’e mós ba turizmu duni, soké liga ba turizmu ne’e ita presiza tan infraestrutura hanesan portu, aeroportu depois estrada sira ne’ebé liga fatin turizmu relijiozu nian sira hanesan Ramelau, Matebian, no igreja tuan sira ne’e tenke hadia para fasilita ema ba iha ne’ebá”, dehan deputadu Assanami iha CCD, Segunda (17/5). 

Deputadu ne’e akresenta, fatin sira ne’ebé komunidade sira hela ba ne’e hola parte ba iha turizmu komunitáriu. Signifika komunidade sira mak prepara uma sira ne’e, maibé infraestrutura báziku ne’e importante inklui sistema saúde ne’ebé diak para halo tratamentu ba turista sira ne’ebé bainhira hetan moras.

“Ita sempre ko’alia prioridade maibé kuandu ita halo korelasaun ho orsamentu ne’e la relevante ka la’os prioridade, maibé mós ita kompriende situasaun ne’ebé apertadu ne’e ita aponta ba infraestrutura báziku, tanba infraestrutura báziku ne’e mós ba turizmu hanesan estrada tenke di’ak, bee tenke diak, portu tenke diak”, dehan nia. 

Tuir Assanami, semináriu ne’e diak maibé tenke tau ona fazeadamente programa turizmu no agrikultura tenke tama ona prioridade, tanba iha ona eskrisaun planu estratéjiku tau duni ona setór produtivu, tanba ne’e setór produtivu ne’e mak mina-rai deit mak konsentra, maibé konsentra ona ba turizmu, tanba turizmu bele sai mós área ida ne’ebé fó benefisiu ba povu Timor Leste no sai futuru sustenstabilidade ekonomia iha futuru.