“Hanesan membru kooperativa CU Builale, ita fó agradese ba sekretáriu estadu ne'ebé ke bazeia ba relatóriu ne'ebé ohin prezidente kooperativa CU relata ba ita hotu dehan katak fundus mós sekretáriu estadu fó apoiu ba ita no materiál balu mós fó apoiu ba ita, ne'ebé ita hotu agradese ba kontribuisaun ida," Administradór Postu Ossú, Augusto de Sousa hato'o agradesimentu ne'e durante halo intervensaun iha sentru koopetiva CU iha suku Builale, kinta (28/01).
Nia haktuir, durante inísiu kooperativa CU Builale harii iha tinan 2018 to'o 2020 prezensa SEKoop nian sempre lori haksolok ba sira, tanba sira-nia sentru ba kooperativa ne'e rasik mós sekretáru estadu rasik mak ba direta halo inaugurasaun.
Nia dehan, iha relatóriu Prezidente Kooperativa relata ona katak ho osan ne'ebé akumula bele benefísia ona membru sira hamutuk na'in-20.
Maibé, nia husu ba membru sira tomak atu labele taka oadamatan kooperativa CU Builale nian ba família sira seluk ka populasaun ruma ne'ebé karik iha mós interese atu sai membru.
“Ita labele bandu sira, maibé ita-nia odamatan loke ba sira para sira hakarak bele simu tanba kooperativa ne'e la'ós dehan ema ida, ema rua mak dehan hari'i kooperativa ida, maibé kooperativa ne'e ita tenke lori ema barak mak bele harii kooperativa”, dehan nia.
Nia fó ezemplu, kooperativa ida-ne'ebé halo husi membru sira iha UNIZMA Pro-RDTL, ne'ebé halibur ema barak mak halo, la'os ema ida ka ema-rua de'it, maibé sira forma liuhusi komisaun.
Tuir nia, atu hetan osan husi kréditu, la presiza empresta husi banku ne'ebé funsionáriu públiku sira halo ho funan ne'ebé boot, maibé di'ak liuhusi kooperativa CUB, memrbu sira bele hatama nia osan tanba funan-kiik.
“Ne'ebé ha'u hakarak hato'o ba Ita-boot sira, ita labele obriga, maibé hotu buka sira- ne'ebé ke hakarak tama iha kooperativa CU Builale, ita nia odamatan loke ba sira”, tenik nia.(*)