Ministru Turismu Komérsiu no Indústria José Lucas do Carmo, simu ona pedidu formál hosi autoridade Covalima no Bobonaro nian iha semana liubá no koordena ona ho MKAE no CLN hodi prosesu intervensaun ba merkadu iha munisípiu rua ne’e.
“Ministru simu tiha ona no agora ne'e iha ona MKAE ko’alia ho CLN atu hatún halo intervensaun ba merkadu,” Ministru José Lucas ko’alia iha Palásiu Governu, tersa (02/03).
Iha parte seluk, Xefe Suku Taroman Leonel Asa, katak fós iha postu Fatululik suku Taroman folin fós sa’e no hahú menus, daudaun ne'e fós saka ida kilógrama 25 ho folin sa’e ba dolar $17 to’o $18.
Nune'e Leonel Asa, husu ba governu relevante atu tau matan mós ba postu administrativu Fatululik, nune'e povu labele mate ba hamlaha.
Entertantu observasaun www.tempotimor.com iha terrenu katak, iha merkadu Suai folin fós kilógrama 25 kada saka sa’e $14.50 sentavu, kareta sira-ne’ebé bainbain fa’as fós iha postu Fatululik, Fohorem, Maukatar, Zumalai no Tilomar, la halo movimentu tanba situasaun munisípiu Covalima iha ona transmisaun lokál, liuliu iha postu Tilomar no Fatumea.(*)