Tuir informasaun ne'ebé www.tempotimor.com asesu iha pajina ofisial MTKI, loron Tersa (31/01) katak, Ministru Turizmu Komérsiu no Indústria (MTKI), José Lucas do Carmo da Silva, hasoru malu ho Primeiru-Ministru (PM), Taur Matan Ruak, hodi relata kona-ba natureza ne’ebé sei akontese iha loron 20 fulan-abril tinan 2023, Timor-Leste sei hasoru Total Solár Eclipse (Loron Nakukun) ne’ebé sei afeita barak liu, husi Com-Lautém to’o Beaco-Vikeke.
Tanba antes ne’e, Prezidente Repúblika (PR), José Ramos Horta anúnsiu ona ba komunidade internasionál, kona-bá Total Solar Eclipse iha Timor-Leste, iha mundu akontese de’it iha rai balun, tanba ne’e tuir previzaun katak, sientista no turista barak mak sei vizita mai Timor-Leste, nune’e presiza iha preparasaun, tanba asosia ho turizmu.
MTKI sei prepara konseitu ida klaru, hodi hato’o ba Primeiru Ministru, nune’e hetan despaixu ofisiál ba liña-ministeriais ne’ebé responsabiliza ba Seitór Turizmu hodi kordena malu, oinsá iha preparasaun di’ak simu sientista no turista ne’ebé sei vizita Timor-Leste.
“Ida ne’e presiza kordenasaun di’ak husi Inter-ministerial asuntu turizmu nian hodi hato’o konseitu ba Primeiru Ministru”, dehan Ministru José. (*)