Deputada Bankada Congresso Nacional de Reconstrução de Timor(CNRT), Carmelita Caetano Monis hatete, planu sosa karreta hamutuk 12 ne'ebé prevé iha Orsamentu Privativu 2022, durante debate konsege kansela planu sosa karreta tolu ba Prezidente Parlamentu Nasionál ho Vise Prezidente PN, maibé mantein sosa karreta sia.
“Parlamentu Nasionál tau osan atu sosa karreta sanulu-resin-rua (12), maibé konsege hasai tiha rihun US$305, nune'e sosa karreta ba prezidente no vise prezidente rua ho eskoltu ne'e hasai tiha, entaun sosa nafatin karreta sia”, dehan nia iha PN, kuarta (13/10).
Karreta hamutuk 6 ne'ebé atu rezerva ba deputadu sira tanba deputadu balun sira-nia karreta tuan dadauk ona tanba ne'e sosa karreta 6 hodi rezerva ba deputadu sira bainhira karreta at.
Maibé karreta foun Prezidente PN ho vise Prezidente na’in-rua ne'e, deputada CNRT, Carmelita Caetano ho Maria Fernanda Lay, konsege hato'o proposta hodi kansela tanba sira-nia karreta atual kondisaun di’ak no foun hela.
“Vise prezidente na'in-rua, sira-nia karreta mos funsiona di'ak hela, se aban bainrua, sira rua nia karreta aat, troka fali ho sira ida ne'ebé mak atu sosa mai rezerva ba deputadu sira ne'e, la presiza ita atu sosa tan”, esplika nia. (*)