Tempotimor (Dili)-Komisaun Permanente Parlamentu Nasionál (PN) aban, loron tersa (10/08), sei hala'o plenária estraordinária hodi diskute no aprova finál globál ba projetu-Lei Organizasaun Judisiál (LOJ) nomós proposta-Lei Organizasaun Funsionamentu Tribunál (LOFT).

Tuir ajenda númeru 285/V (3a), ne'ebé fó sai husi Gabinete Prezidente Parlamentu Nasionál (PN) katak, reuniaun plenária estraordinária ne'e sei prezide husi Prezidente PN, Aniceto Longuinhos Guterres Lopes, iha tuku 09:00 dader, ne'ebé sei hahú ho abertura (antes orden do dia) to'o remata.

Projetu lei Organizasaun Judisiál númeru 19/V (3a) ne'e sei adjusta ho Projetu Lei Estatutu Majistradus Judisiál ho totál artigu hamutuk 179.

Enkuantu relatóriu no pareser ba Lei Organizasaun no Funsionamentu Tribunál númeru 28/V (3a) ho artigu 85 ne'e, Komisaun A aprova ona iha loron 23 fulan-jullu tinan 2021.

Iha  proposta lei ne'e, Komisaun A deside revoga regulamentu UNTAET númeru 11/2002, ne’ebé mak hari’i Tribunál Primeira Instansia haat (4), Tribunál Rekursu ida hanesan konstituisaun fó dalan hodi funsiona hanesan Tribunál Instansia Máxima hanesan Supremu Tribunál.

Nune'e mós iha konkordánsia entre deputadu ho governu kona-ba atu hari’i Tribunál Supremu ho Juis na’in-hitu (7) kompostu husi juis kareira ni’an-4, depois sei halo tan rekrutamentu pur méritu ba juis na’in-tolu (3) hodi kompleta na’in-hitu (7) hodi servisu iha Tribunál Supremu.

Alénde ne’e, konkorda mós hodi tau juis na’in-sia (9) iha Tribunál Rekursu, hodi hala’o nia kna’ar ba julgamentu ba matéria faktu, matéria kona-na direitu ho matéria penál.

Entrentantu iha reuniaun plenária estraordinária, Parlamentu Nasionál sei aprezenta projetu-rezolusaun númeru 79/V (3a), kona-ba fatin ne'ebé atu utiliza ba konstrusaun edifísiu foun ba Parlamentu Nasionál (PN) nune'e sei entrega konpeténsia ba deputadu atu hala'o diskusaum no aprovasaun. (*)