Tempotimor (Dili) - Mosu kazu sona ema iha Munisípiu Baukau iha loron 12 Agostu no iha loron tuir mai kontinua konfrontu iha nunira postu-Administrativu Laga rezulta uma kuaze 12 hetan sunu.

Ho akontesimentu ne'e, Prokuradór Jerál Repúblika (PJR), José da Costa Ximenes informa, daudaun servisu hamutuk ho Polisia Nasional Timor-Leste (PNTL), identifika ona arguidu na'in 21 no fó opsaun rua, ida entrega aan rasik ka buka tuir hodi kaer.

"Agora dadauk Prokuradoria Distritál Baukau ninia xefe ho prokurador sira organiza hamutuk ho orgaun polisia kriminal PNTL Baukau no mos Polísia Investigasaun Kriminal Nasionál, organiza hela ba arguidu ne'ebé ami identifika pelumenus ema 21, sira ba rasik polísia ka ami mak buka tuir para kaer sira", dehan nia hafoin soru-mutu ho Prezidente Republika, Francisco Guteres Lú Olo, iha Palásiu Prezidensiál Bairru-Pité, Tersa (18/08).

Tuir nia, presiza trankilidade no seguransa ba ema hotu tenke kontribui, ida ne'e mak situasaun akontese pelumenus loron 1 to'o 18 Agostu ne'ebé mosu iha Baukau.

Nia hatutan, depois kazu sona ema iha Vila-Nova Baukau, arguidu halai mai Dili, nune'e PNTL kaer hodi aprezenta primeiru interogatoriu tribunal deside aprezentasaun periodika, maibé Ministériu Públiku haree prosesu ne'e no la simu tanba ne'e agora prepara hela prosesu rekursu.

Akontesimentu loton 13 Agostu iha Nunira-Laga ne'e envolve ho grupu arte-marsiál IKS ho PSHT hafoin akontesimentu iha loron 12 Agostu.

Alende akontese iha Baukau Vila no Laga, iha mos akontese mos iha postu-Administrativu Vemasse akontese omesidu no Munisípiu Manufahu ne'ebé kazu ho forma tentadu konjuga ho rama ambon.

Prokuradór hatutan, iha Same mós akontese kazu omesidu ho forma tentadu konjuga ho rama ambon, entaun tribunal Suai deside prizaun preventiva. (*)

Tempotimor (Dili) - Prokurador Jerál Republika servicu hamutuk ho Polísia Nasional Timor-leste (PNTL), Sekretariu Estadu Meiu Ambiente (SEA), no Ministériu Saúde (MS) deside sunu materiál droga ne'ebé prende hamutuk tonelada 160.

Tempotimor (Dili) – Ministru Justisa (MJ) Manuel Cárceres da Costa aprezenta Dekretu do Governu ida, ba Konsellu Ministru (KM) ne'ebé bele regula karreira majistradu sira iha Ministériu Públiku (MP).

"Ohin Ministru Justisa aprezenta mós kona-ba proposta Dekretu do Govemu, ne’ebé aprova husi Konsellu Ministru, kona-ba Atualizasaun Kuadru Pesoál iha Ministériu Pilbliku," dehan MJ Manuel Cárceres da Costa, hafoin reuniaun Konsellu Ministru, Kuarta (20/11/19).

Nia afirma, Dekretu do Governu ne’e atu kria kondisaun hodi regula dezenvolvimentu iha karreira majistratura husi Ministériu Públiku no hodi haluan vaga servisu ba fatin-fatin ho karreira ne’ebé hanesan.

“Iha kumprimentu husi ezijénsia legalmente estabelesidu no iha kumprimentu husi objetivu ne’ebé tau ona iha Programa VIII Governu Konstitusionál, hanesan konsolidasaun iha seitór justisa, ho rekursus umanu ne’ebé kompetente, independente no profisionál," esplika MJ Cárceres.

Tempotimor (Dili) – Prokuradór Jerál Repúblika (PJR), José da Costa Ximenes hatete, kazu desputa rai iha Kaitehu, Munisípiu Likisa ne'e iha Diresaun Nasionál Terras e Propriedades (DNTP). Tan ne'e, tuir PJR José Ximenes, Ministériu Justisa mak bele esplika kona-ba problema ne'e.

"Problema rai, hanesan problema ne'ebé importante. Tanba sai hanesan sentru konflitu iha Timor-Leste. Ita sei lembra 2006 no 2007, kuandu krizi akontese, funsionáriu no autoriedade lokál barak to'o rejistu hotu fahi luhan hotu para hetan osan," dehan PJR José da Costa Ximenes iha Palásiu Prezidensiál Bairro-Pite, Segunda (07/10/19).

Nia dehan, iha tempu agora ema balun hahú fa'an fali rai estadu ba estadu. "Agora, ema balun fa'an rai estadu ba estadu. Rai ne'e rai balun estadu ninian balun komunitáriu ninian no rai privadu. Ida ne'e problema DNTP nian. Ne'ebé ha'u hanoin estadu ne'e tenke afirma, se la afirma susar," José tenik.

Tuir nia, rai ne'ebé iha parte tasi ibun hanesan iha parte Bebonuk nian, ne'ebé estabelese Hotel Arbiru ne'e, ema halo uma arbiru. Inklui estrada sira. Maibé, tuir loloos metru atus ida husi tasi ibun ne'e partense ba rai estadu.

"Ita lalika ba dook ida. Rai ida Hotel Arbiru nian tesik ba tasi ibun ne'e, ema halo uma arbiru no estrada. Ita boot sira hatene, metru 100 husi tasi ne'e partense ba estadu. Maibé, saida mak akontese, bainhira ema ba halo uma iha ne'ebá laiha Obras Públiku inklui DNTP fó hatene katak rai ne'e estadu nian," dehan PJR.

Nia mós husu ba Ministru Justisa atu hatán ba problema ne'e, tanba problema ne'e kona-ba DNTP, Ministériu Justisa.

"Liuliu ema sira ne'ebé halo uma tuir mota ibun, hanesan iha Kaitehu, Likisa nian ne'e problema DNTP. Tan ne'e, husu ba señor Ministru Justisa para bele responde situasaun ida ne'e," PJR afirma.

.