Ministra Saúde Odete Maria Belo hateten, kazu pozitivu mosu ne'e la’ós manipulasaun maibé tanba prezensa ema iha Timor-Leste dentru fulan klaran, tanba ne'e presija loron 14 hotu halo teste no posibilidade mosu kazu pozitivu iha dentru fulan ikus ou inisu fulan foun.
"Tuir loloos perguntas ida ne'e lapresija atu husu, tanba pozitivu ne'e pozitivu ona, ita la buka para atu bele manipula buat ruma," Odete hateten lia hirak ne’e iha Parlamentu Nasionál Dili, Kinta (3/12).
Governante ne'e akresenta, bainhira partisipa iha reuniaun konsellu estadu (KE) no konsellu seguransa (KS) parte governu relata ba iha Prezidenti Repúblika katak TL laiha kazu (negativu), maibe iha tempu governu perpara atu debate ou husu autorizasaun iha Parlamentu Nasionál sempre mosu kazu pozitivu Covid-19 foun.
"Tuir loloos laiha resposta sentifiku ida ba ida ne'e, so data monu ne'e mak aserta (pas) los ho tempu ne'ebé ita husu estadu emerjénsia," Odete dehan.
Entertantu, tuir dadus MS ne'ebé www.tempotimor.com asesu, daudaun ne'e Timor-Leste mosu tan kazu pozitivu foun 1, nune'e total kazu pozitivu hamutuk ema na’in 31, husi númeru refere ema na’in 30 mak rekopera ona. (*)