"Ohin sorumutu Nasionál iha Baukau hodi integra vasinasaun Covid-19 ba programa imunizasaun rutiña no preparasaun ba kampaña vasinasaun Sarampu, Rubela, PCV, Vit A no Albendazole," dehan Vise MS Boniofacio Maucoli dos Reis iha Sentru Konvensõens Baukau (CCB-sigla portugés), tersa (09/08).
Tanba durante implementa vasinasaun covid-19 iha Timor-Leste hasoru dezafiu barak hanesan, hasoru media sosial eletronika hodi hatauk komunidade simu vasina kontra covid-19.
Maibé ultrapasa, tanba konsege hasa'e konjuntura pursentu vasina doze dahuluk iha nivél nasionál husi vasinasaun astrazeneca, sinovac, pfaizer hamutuk pursentu 88, inklui vasinasaun Booster faze daruak nian.
"Haree ba progresu vasina kontra covid-19 iha Timor-Leste, populasaun husi idade liu 18 ne'ebé simu ona doze dahuluk pursentu 87,4 no doze daruak pursentu 77, Booster pursentu 23, vasina Pfizer iha eskola doze dahuluk atinji ona pursentu 92, doze daruak pursentu 67," nia informa
Maibé, husi nasaun viziñu kontinua rejistu kazu covid-19, nune’e MS kontinua buka estratejia foun hodi fó vasina kontra covid-19 nian ba komunidade.
Tanba ne'e, MS hahú hakat ba faze foun atu integra hikas programa vasinasau rutina sira, hanesan Sarampu-Rubela, PCV, Vit A no Albendazole liuhusi kampaña hodi intruduz ba komunidade, maibé prezisa kontribui husi entidade relevante hotu katak vasina kontra covid-19 alende programa rutina sei implementa iha nivél Óspitalar liliu Óspital nasionál, regionál no referal inklui sentru saúde, postu saúde, siska no saúde na família.
"Tekníkamente atu hatete, konseitu prestasaun servisu atensaun saúde primaria sei re-organiza ita sei hein de'it komunidade iha fasilidade saúde, tanba esperensia hatudu ona komunidade barak mak hasoru problema saúde oioin, maibé la besik mai fasilidade saúde, tanba jeografika no ekonómia, ho konseitu foun, sira la mai, ita (pesoal saúde) mak sei hakbesik ba sira, nune'e bebeik ita sei liberta komunidade husi problema saúde oioin ne'ebé hasoru," nia hatete
Tanba faze foun integrasaun servisu mak dalan di'ak atu hasa'e kobertura ba programa sira sei hahú husi nivél nasionál inisiu fulan-outumbru tinan-2022.
Diretór servisu saúde Munisípiu Baukau, Domingos Reinaldo Guterres, orgullu, tanba MS bele re-integra programa vasinasaun husi covid-19 nian ba programa vasina rutina ba komunidade.
Vasinasaun rutina kona-ba sarampu nian inklui fahe aimoruk vitamina A no Albendazole ba komunidade sei hahú iha fulan-outumbru tinan-2022, bainhira realiza ona kampaña nasionál.
"Ha'u hanoin liga ba vasinasaun hanesan prevensaun moras sira ne'ebé iha atu bele reduz taxa morbilidade iha ita nia nasaun," nia dehan
Enkuantu sorumutu nasionál realiza durante loron 3 iha Baukau partisipa husi Diretór Jerál, nasionál, Munisípal, xefe sentru saúde, inklui responsabilidade saúde na familía, promosaun saúde, inklui imunizasaun nian hamutuk na'in-624 iha teritóriu nasionál. (*)
