“Informa mós ba públiku katak, maske Laboratóriu Nasionál Saúde (LNS) haruka ona amostra husi Dili ho Covalima, no hein hela resultadu sekuénsiasaun genómika, aumentu maka’as kazu iha loron 5 ikus hatudu katak, iha possibilidade boot variante Delta mós sirkula ona iha munisípiu ne’ebé númeru kazu (insidénsia) sa’e maka’as”, dehan Kordenador Forsa-Tarefa ba Prevensaun no Mitigasaun Surtu Covid-19 iha Timor-Leste, Rui Maria de Araújo liuhusi komunikadu imprensa, sesta (13/08)

Tanba haree husi dadus insidénsia munisípiu Dili ho munisípiu Ermera tuir malu a’as liu iha Timor-Leste laran tomak no tuir munisípiu haat seluk Covalima, Aileu, Bobonaro, Ainaro ho RAEOA, mós hatudu risku a’as-liu, atu populasaun hetan da’et no hada’et tutan vírus SARS-CoV-2, iha komunidade nia le’et. (*)