Tempotimor (Dili)-Koordenadór Forsa-Tarefa ba Prevensan no Mitigasaun Surtu Covid-19 iha Timor-Leste, Rui Maria de Araújo hatete, Sentru Integradu Jestaun ba Krize (SIJK) rejistu kazu pozitivu Covid-19 foun hamutuk 57 no munisípiu Baukau iha 27.

“Kazu detetatu foun ne’ebé relata iha loron 13 fulan-juñu tinan 2021 hamutuk 57, iha Dili 25, iha Munisípiu seluk 32, ne'ebé kompostu husi  Baukau 27, Manatuto 2, Manufahi 1 no RAEOA 2”, dehan Rui liuhusi komunikadu imprensa, domingu (13/06).

Husi totál kazu detetadu foun iha mane 33, feto 24 ho idade tinan 12 na'in-3, ho idade entre tinan 12-59 na'in-51 (89,4%), ho idade 60 na'in-3, proporsaun kazu sintomátiku hamutuk 7,0%.

“Kazu rekuperadu 101, totál kazu ativu 1536 no totál kazu konfirmadu kumulativu iha 13 Juñu 2021 (sura husi 21 Marsu 2020) hamutuk 828”, informa nia.

Husi loron 12n to’o 13 fulan-juñu, hamutuk hotu Laboratóriu Nasionál Saúde (LNS) halo 699 testes PCR iha Dili, ho detalla hanesan, vijilánsia sentinela 40, rastreiu ba kontaktu (contact tracing) 40, rastreiu aleatóriu (random screening) 151, viajen sai husi serka sanitária Munisípiu Dili 427, viajen internasionál 5 no follow up iha kuarentena 36.      

Rezultadu teste PCR ne’ebé halo iha loron 12 fulan-juñu iha munisípiu sira seluk, REAOA ho HNGV, hamutuk 315, ho detalla hanesan, Baukau 82, Ermera 0, Maliana 21, Maubisse 70, RAEOA 17, Suai 33, Vikeké 2 no HNGV 91. (*)