Xefe Gabineti Autoridade Munísipiu Baukau, Carolino da Costa, hatete, ba kualkér kandidatu ne'ebé uza Sentru Konvensaun Baukau (CCB-sigla portugés) vila antiga, hodi realiza atividade, tenke aluga.
Nune'e, karreta kór mean sapamatrikula 06-720 G, marka hilux, husi autoridade Baukau horseik loron 07 fulan-abril tinan-2021, parte dader tula agua ba iha fatin CCB vila antiga aluga ou enxe mina osan US$35 husi ékipa susesu kandidatu númeru sorteiu 2 ne'ebé halo dialogu ho komunidade Baukau.
"Média la hatene, halo públikasaun la husu klarifikasaun defaktu mak ne'e, kuandu ema aluga ita apoiu, la'os kandidatu Lú Olo de’it, kandidatu sira seluk uluk aluga CCB husu apoiu ami apoiu," nia informa iha kna'ar fatin administrasaun Baukau, kinta (07/04).
Tanba, Sentru Konvensaun Baukau (CCB-sigla portugés) iha vila antiga (kota lama) responsabiliza husi Prezidente Autoridade Munísipal, nune'e kandidatu sé de'it atu realiza atividade partidu nian bele uza, maibé tenke aluga.
Nune'e, husu média tomak hanesan média online, media jornal no televizaun bainhira halo kobertura atividade iha Baukau relasiona ho asuntu Autoridade Munísipiu apoiu transporte ba entidade husi partidu polítiku no ajénsia sira presiza halo konfirmasaun.
"Kuandu aluga ona fatin CCB autoridade iha obrigasaun kuandu sira husu apoiu la'os tula de'it agua, tula kadeira meza mós bai-bain tula, foin tula agua ne'e pakote aluga nian, la'os relasiona ho partidu," nia argumenta (*)