“Tambem haruka ona karta ba sua eselénsia Prezidente Repúblika, e haruka hikas karta ida ba ha'u nomós ba Ministra Negósiu Estranjeiru no Kooperasaun atubele intergra ekipa husi prezidente eleitu nian iha komisaun organizadora hodi halo preparasaun ba eventu rua ne'e”, dehan Ministru Administrasaun Estatál, Miguel Pereira De Carvalho, iha Palásiu Prezidensia Repúblika, Bairopite, segunda (25/04)
Dadaun ne’e Governu deside ona Ministériu Administrasaun Estatál no Ministériu Negósiu Estranjeiru no Kooperasau (MNEK) mak sei lidera Komisaun Organizadora ba serimónia toma pose iha loron 19 no 20 maiu.
Tanba ne'e, nu’udar Prezidente Komisaun Organizadóra ba ko'alia ho Prezidente Repúblika, Francisco Guterres ‘Lú Olo’, ba preparativu sira ne'e inklui nesesidade sira atu koordena malu ho ekipa tranzisaun prezidente eleitu nian.
“Eh ami hanesan komisaun organizadora ba eventu rua ne'ebé realiza iha dia 19 no 20 de maiu, mai ko'alia ho Prezidente Repúblika, asuntu hanesan ita-boot sira hatene, komisaun organizadora planea ona no organiza hala'o dadauk atu realiza serimónia toma pose Prezidente eleitu iha dia 19 maiu, iha Tasitolu. Depois iha dia 20 maiu sei realiza serimónia isar bandeira iha palásiu prezidente”, afirma nia.
Durante audénsia ho Prezidente Repúblika ko’alia mós kona-ba konvidadu sira ne'ebé mak sei konvida atu tuir serimónia toma pose ho selebrasaun 20 maiu, no informasaun ida ne'e, sira sei informa hikas bainhira fahe konvite. (*)