La'ós ona segredu ba públiku, koligasaun bloku AMP naksobu hafoin Orsamentu Jerál Estadu (OJE) tinan fiskál 2020 xumba iha Parlamentu Nasionál (PN).
Maski nune'e, Partidu KHUNTO rasik seidauk foti pozisaun tanba sei entrega ba desizaun lider másimu AMP nian hanesan Xanana Gusmão,Taur Matan Ruak no José 'Naimori' Bucar.
"Koligasaun AMP bele dehan entrega ba maun na'in tolu," dehan Prezidente Partidu KHUNTO, Armanda Berta, iha Palásiu Prezidensiál, Bairru-Pité, Kinta (23/1).
Hataan ba Porta-vós AMP, atuál Primeiru Ministru, Taur Matan Ruak katak, AMP laiha ona, Berta lakohi fó komentáriu.
Nia dehan, relasiona ho impase polítika, KHUNTO nafatin apoiu ba desizaun Xefe Estadu nian hodi buka solusaun di'ak ba destinu nasaun.
Antes ne'e, Primeiru Ministru, Taur Matan Ruak, ne'ebé mós nu'udar Porta-vós AMP deklara katak, AMP la eziste ona hafoin Orsamentu Jerál Estadu (OJE) tinan fiskál 2020 la pasa iha Parlamentu Nasionál. (*)