"Komu konfuzaun maka iha ita-nia sosiedade, komunidade, ita bele dehan katak, má-jestaun iha anteriór, ita-nia ukun-na'in sira atu señor Xanana fali ka señor Alkatiri fali ga, sira-nia má-jestaun mak ida-ne'e, lori povu nia osan ba sosa sasan ne'ebe mak hanesan tuan nian, ne'e má-jestaun mak ida-ne'e," dehan nia iha plenaria PN, segunda (21/11).
Nia dehan, tuir loloos, governasaun anterior ho autoridade RAEOA anterior halo planu hola buat ne'ebe foun atu lori mai Timor, hodi halo operasaun no bainhira nia aat Parlamentu Nasional bele halo aditamentu ka aumenta osan ba halo manutensaun.
"Mais se ida-ne'e fizakamente nunka mai depois aumenta osan ba beibeik, ne'ebe ita espera katak, ne'e tenke mai, se la mai mak, estadu ne'e ita-nian, osan ne'e ita-nian, ita mak sei moris hamutuk iha Timor-Leste ne'e ita sei follow up ida-ne'e to'o Ró Haksolok ne'e mai", nia hatete.
Fiar katak, iha oitavu governu Ró ne'e sei mai, tanba iha diskusaun Orsamentu Jerál Estadu (OJE) 2023 mós prezidente RAEOA, Arsenio Bano inklui polítika altu nivel sira ko'alia ona katak, Ró ne'e sei mai.
"Ne'ebé bainhira mak mai, ita tenke hein duni, eh osan ne'ebe hanesan anterior, halo manutensaun ba ida-ne'e, halo tiha ona, mais seidauk remata eh ita presiza duni aumenta para tenke halo hotu, se la aumenta maka ita halakon ita-nia osan ne'ebe uluk ita lakon", nia afirma.
Purtantu durante iha debate espesialidade b próposta-lei OJE 2023 iha plenária PN, kuarta (16/11), Prezidente RAEOA, Arsenio Bano deside husu tán osan millaun US$1.3 atu finaliza konstrusaun Ró Haksolok, tanba prógressu fiziku foin atinje 65.
“Prógresu konstrusaun bá Ró Haksolok, oras-ne’e foin atinje 65%, maibé sei presiza tán orsamentu millaun US$1,3 hodi finaliza konstrusaun ne’e", nia akresenta.
Husu ba Deputadu sira, atu apoiu bá próposta ida-ne’e, hanesan responsabilidade koletiva ne'ebe RAEOA tenke halo hotu servisu, tanba durante ne'e Timor-Leste gasta ona millaun US$12 eurós, entaun tenke iha obrigasaun atu selu tán millaun US$1,3, bainhira Ró ne’e to’o iha ne’e TL.
Tanba, iha adenda kontratu Ró Haksolok bá dala-lima, entaun autoridade RAEOA asina kontratu iha fulan-kotuk, ho valór orsamentu la muda, signifika mantein ho montante orsamentu ne’ebé antes ne’e Kintu-governu iha 2014 no 2015.
“Ita selu ona millaun US$12, falta millaun US$1 de’it atu Ró ne’e to’o iha ne’e”, nia salienta
Primeiru kontratu ne'ebe hala'o husi Kintu-governu, Konsellu Ministru hasai rezolusaun governu hodi deside, lideradu husi eis Primeiru Ministru, Kay Rala Xanana Gusmão ho Pedro Lay. Iha 2015, no Gastão de Sousa, eis ministru halo modifikasaun, tanba haluha buat balun hanesan kondisaun aeroportu ba Ró Haksolok la apár ho TL nia portu tolu, hanesan Oecusse, Díli ho Ataúru ne’ebé nia kondisaun ki'ik no klo'ot.
Tanba ne’e, Autoridade RAEOA deside halo pontoens, maibé pontoens la’ós RAEOA deside mesak.
Iha kinta adenda kontratu ne’e mós la'o tuir de'it rezulsaun ajudikasaun direta ne’ebe momentu kintu-governu mak halo rezolusaun, enkuantu iha mandatu Prezidente agora nian, la fó sala bá kintu-governu, la fó sala bá ema ida, maibé so hala'o de'it misaun atu kompleta Ró ne’e lori mai TL.
Entretantu alokasaun orsamentu bá REAOA nian iha OJE 2023 ho totál US$120.000.000, nune'e iha votasaun espesialidade, hetan aprovasaun ho rezultadu votus afavór 43, kontra 3, abstensaun 16. Nune’e, orsamentu bá RAEOA pasa iha espesiálidade. (*)
