Ministru Negósiu Estranjeiru no Kooperasaun (MNEK), Dionisoo Babo Soares hatete, governu Timor-Leste sei forma ekipa ki'ik ida para bele fó agradese ba governu Nova Zelándia, relasiona apoiu ne'ebé fó ba Timor-Leste.
"Primeiru Ministru ohin husu sé bele forma ekipa ida para bele ba fó agradese tanba bele lori estudante sira. Nune'e, Governu sei haree no prepara hela", dehan nia, iha Palásiu Governu, Kuarta (12/2).
Entertantu, Ministru Dionísio afirma, estudante nain 17 ne'ebe iha Nova Zelándia ho kondisaun di'ak, tanba médiku sira iha ne'eba halo kontrolu loron-loron.
"Informasaun ne'ebe ami rona katak, sira iha ne'eba di'ak hotu hela, ita espera katak semana ida nia-laran hanesan ne'e sira bele mai ona Timor-Leste", tenik nia. (*)