Prezidente Repúblika, Indonézia, Joko Widodo agradese bele hasoru malu no kongratula Xanana no membru tomak ne’ebé eleitu iha eleisaun demokrátiku no simu posse foin lalais ne’e hodi hala’o servisu iha Governasaun dasia durante tinan liman nia laran.
“Benvindu, Exelensia Primeiru Ministru Xanana Gusmão ho delegasaun ministru sira hotu, no parabens exelensia ba pose foin lalais ne’e. Indonézia ho Timor-Leste nasaun maun alin, nune’e ita-nia kooperasaun tenke hamentu liután. Ha’u hakarak informa asuntu tolu, primeiru kona-ba Timor-Leste sai membru iha ASEAN, Indonézia sempre ajuda no aplikasaun Timor-Leste atu sai membru no kapasitasaun rekursu umanu ba membru governu sira ne’e importante”, dehan PR Jokowido durante reniaun Bilaterál iha Pálasiu Prezidensiál, Jakarta.
Prezidente Jokowi dehan, Indonézia no Timor-Leste sei kontinua servisu hamutuk hodi ajuda rekursu umanu no setór ekonomia no dezenvolvimentu infraestrutura Timor-Leste.
Iha fatin hanesan, Primeiru-Ministru Xanana Gusmão hato’o uluk obrigadu barak ba Prezidente Joko Widodo hodi konvida nia partisipa iha forum Association of Southeast Asian Nation (ASEAN) Business & Investment Summit 2023 ba dala-43 iha Jakarta-Indonézia.
“Ha’u hato’o obrigadu barak ba exelensia fó konvite ne’e mai ha’u. Ha’u orgullu tebes, hanesan prezidente dehan lolos, ita maun alin no atendimentu durante ne’e di’ak tebes, ita hanoin katak, ita-ne’e tenke metin liután”, dehan PM Xanana.
Xefe Governu kontraula Estadu Indonézia ne’ebé sai uma na’in hodi organiza forum ASEAN Business & Investment Summit ne’ebé konvida xefe estadu no xefe governu nasaun 26 inklui Timor-Leste hola parte nu’udar obserbadór atu bele aprende matenek hosi nasaun membru sira.
PM Xanana to’o Palásiu Prezidente Indonézia simu ho parede militár kontinua kedas ba sala’o hasai fotografia no asina livru de onra hodi kontinua hala’o kedas enkontru bilteràl.
Vizita PM Xanana akompaña direita husi Vise Primeiru-Ministru no Ministru Koordenadór ba Asuntu Ekonomiku, Ministru Turizmu no Ambiente, Fransisco Kalbuadi Lay, Ministru Negósiu Estranejeru no Kooperasaun, Bendito dos Santos Freitas, Ministru Interior, Fransisco Guterres, no Vise Ministra Negósiu Estranjeru no Kooperasaun, Milena Rangel, enkuandu PR Jokowi akompaña husi Ministra Negósiu Estranjeru, Retno Lestari Prinsari Marsudi, Sekretária Gabinete, Pramono Anung, Menki Polhukmam, Mahfud MD, no Ministru Agrikultura, Syahrul Yasin Limpo. (*)