Parte prizaun deklara, sira esforsu atu implementa regras estadu emerjensia iha prizaun laran, maibé iha pontu ida iha regras estadu emerjensia ne'ebé defisil uitoan atu implementa mak distansia sosial.
Diretór Prizaun Bekora João Domingos hatete, iha loron hirak liu ba nia parte konvida serbisu saúde munisipiu Dili no ekipa Organizasaun Mundial Saúde (OMS) hodi esplika ba guarda prizaun sira oinsa atu prevene Covid-19.
Maibé, nia hatete, atu aplika regra kona-ba distansia sosial iha prizaun laran defisil uitoan tanba númeru prizionariu ne'ebé barak demais.
Daudauk ne'e total dadur iha prizaun hamutuk na'in 599, kompostu husi prizaun kondenadu hamutuk na'in 466 no prizaun preventiva na'in 133.
"Atu aplika distansia sosial susar uitoan, tanba ema iha prizaun barak demais entaun kalan na'in rua tenke toba hamutuk," dehan nia.
Tanba limitasaun espasu, nia hatete, parte prizaun deside atu haketak prizionariu ida bainhira nia hatudu sintomas Covid-19.
"Se sei normal importante kuidadu ida-idak nia an rasik".
Nia dehan, iha bloku C mak kapasidade boot ho sela hamutuk 23 ne'ebé bele akumula prizioneiru na'in 48 to'o 55, maibé bloku ne'e mós over ona.